Assam nungi Bangladesh nunger 17 meyipa yoktsü

Guwahati, January 08(Agencies): BJP teloki yimsüsüba Assam nungi Hindu yimsü amanger nisung asem densema Illegal Bangladeshi Immigrants (IBI) nisung 17 Hombarnü meyipa yoktsü.
Bangladesh, Pakistan aser Afghanistan nungi Muslim masür Immigrants nem citizenship agütsütsü asoshi Citizenship Act, BJP teloki aniba NDA sorkari renemba anema Opposition teloki noktakba sülen iba sentong ya yanglu.
Ketdangsertemi ashiba agi, taoba küm Bangladesh aser Myanmar nungi ozüng alema India linüki aitba nisung 54 rongnung par 17 ya densema liasü. Parnok ya 2015 küm nungi Assam nung aliba Silchar Central Jail nung yua lir.
“Bangladesh nung ketdangsertem den anaben ajuruteba jembiba sülen parnok 17 ya meyipa yoktsü lemtet. Parnokji Karimganj sector ajanga Hombarnü Bangladesh-i meyipa yoktsü,” ta Chachar Superintendent of Police, Rakesh Roushan-i osangbener dang shia liasü.
Hindu nunger asemji Bhagabati Goala (50), Rahul Das (23) aser Mou Das (18) nunger lir. Tamangba yimsü tsütsü reshikangshiba ajanga par asem ya India-i jena aru, ta ashi.
Taoba küm Assam nung ketdangsertemi Bangladesh nungi arur nisung 10 meyipa yoka liasü. Assam nung BJP teloki Illegal Immigrants atema sentong tejangja meyanglui nüburtem mangmangdaktsüba anema Opposition teloki kanga sashia noktaker.
“BJP teloki linük nungi IBI meintoktsü nangzük. Iba sülen parnoki Bangladesh Hindu immigrants nem citizenship agütsütsü asoshi Citizenship Act agizüka ayu. Kodasür iba anaji külemi aotsü?” ta Congress telok nungi asemben tashi Chief Minister inyaksang, Tarun Gogoi-i süngmangba olen ka osangbener dang shia liasü.
Iba den kasaji Asom Gana Parishad (APG) teloka mepelai lir.
“Bendangertem agizükba ajanga Assam ya jana intokba tesem ka ama mekümdaktsütsüla,” ta AGP lenir Prafulla Kumar Mahanta-i shia liasü.
BJP teloki Hindu immigrants ya refugees amai bilemer.
Linük ana sadangba ajanga Bangladesh nung tamangba yimsü mechi reshikangshia merenshiba agi India linüki jena arurtem amai ajiteter. 24 March 1971 nungi tenzüka tamangba yimsü balala amanger immigrants shirnoksa Assam-i aru lir, parnok meyipa yoktsü asoshi 1985 Assam Accord nung renema lir. Assam nung azütokshia longkak aitba sülen iba Accord nung tesüiba mapang Ato kilonser, Rajiv Gandhi-i aniba sorkari kuli agüja renema lir.