La Liga nung Real Madrid-i Granada 5-0 agi akok

Madrid, January 08 (Agencies): Ballon d’Or sempet angusang Cristiano Ronaldo-i 2017 küm atema mezüngbuba goal agüja Honibarnü, Real Madrid-i 5-0 agi Granada akok, aser iba ajanga Barcelona-i Spanish league nung asaya 39 nung khena tamakok mongoi yangluba otsü den saku kümogo.
Sevilla club nungi Wissam Ben Yedder-i hat-trick agütsüba ajanga jenjang trokbuba nung aliba Real Sociedad madak 4-0 agi akokba ajanga Sevilla-i Barcelona club ajanga tanabuba jenjangi tuogo aser parnoki points pezü agi Real Madrid memenepi lir. Tanga asaya nung Atletico Madrid teloki 2-0 agi Eibar club koka parnok jenjang pezübubai atu.
Tamalen Ballon d’Or angur Real Madrid nungi asayar Luis Figo, Ronaldo, Michael Owen aser pa indang coach Zinedine Zidane nungertemi Bernabeu nung Ronaldo nem asaya metenzüktang akhümtsübu agüja liasü.
Isco aser Karim Benzema-i goal kaka agüja liasü aser Copa del Rey nung Sevilla den asayadang anisüngzükdakja alisang Ronaldo-i goal ka tekolak agi tongoktsü.
Iba sülen Isco-i goal tanabuba agütsü aser James Rodriguez-i free-kick ka metsüba ball Casemiro ajanga yoka goal pongu ajung. Deobarnü Barcelona-i Villarreal akoknungbo parnoki Real Madrid points asem agi temeneper akümtsü.
“Yangi kecha tatakzük mali, saka onoki akokba tashi tajungtiba nung asayatsüla,” ta Zidane-i shia liasü.
Zidane-i par tsütsü temelenshi pezü yanglu. Pai Keylor Navas goalkeeper aitdaktsü aser Ronaldo, Benzema aser Isco aitdaktsü.
Real Madrid captain Marcelo iba club-i arur küm ter ajungba asaya nung pinpoint cross ka agütsü aser Ronaldo-i goal yoka liasü.