Amir Khan indang film-i PK ajatetogo; Hindi film rongnung sen teimtiba aazükba film kümogo

Mumbai January 9, 2017(Agencies): Dangal film-i sen crore 345.3 aazükba sülen, Bollywood nung nüngtuku actor Aamir Khan-i otsü tasen ka yangluogo. Dangal-i pa indang film PK ajateta Hindi film rongnung sen teimtiba aaba film kümogo.
Nitesh Tiwari-i direct süa asaya dak ajemdaker yangluba film ya melangteper Mahavir Singh Phogat taküm otsü nungi agizüka yangluba film ka lir.
Yaküm December 23 sayaba film Dangal-i January 8 nü sen crore 14.33 aazük, tang tashi nung sen ajak agi crore 345.3 aazükogo, ta film yanglurtemi metetdaktsü.
“Disney Studio nung, Dangal film ya onok asoshi kanga tongtibang lir. Aamir Khan den onoki tan agi film 9 buba yanglur, aser iba film ajanga onoki PK-i yangluba otsü ajateta otsü tasen ka yanglüogo. Aamir Khan-i film shia jenjang tasen ka yanglur,” ta Studios, Disney India tatong tir, Amrita Pandey-i ashi.
Phogat shibai pa kinungtsü, aser yimertem ajaki memulungi liaka par jala, Geeta aser Babita na melangteptsü asoshi sayu, iba indang otsü jangjajangja-a iba film nung sayuba atema tereprangertemi kanga pelaa agizük.
Christmas mongpu ya küm ishika Aamir asoshi tia akaba mapang ka asütsü südi. PK, Dhoom: 3 aser 3 Idiots ajak ya iba mapang nung sayaa liasü.
Pandey-i ashiba agi “Dangal film ajanga India tesem ajak nung otsü tasen yangludar.”
Delhi, Uttar Pradesh, Punjab, Rajasthan, India teyongtsülen aser International shishilemba dak-a North America aser Australia amala nung Dangal-i jenjang tasen ka yangludar. Maneni North America nungbo 2061 küm asoshi Dangal ya Foreign oshi nung yangluba film rongnung sen teimtiba aazükba film asütsü. Tamil oshi agi meyipzüka adokba film tem rongnung Jungle Book film, koba temaba jenjang nung liasü iba ya Dangal-i ajatetogo.”