Afghanistan:Cricket asayar Zadran memetetba nisungi amak

Kabul, January 09 (Agencies) : Afghanistan nungi cricketer asayar Shapoor Zadran mejangjatetba nisung kari prangpong amer arua amak. Item nisungtem jagi pa adianu tena mena aliba gari nung injang kahloktsü.
Honibar aonung atalokba lendong nung ya shinga meyiru. Zadran ya kidangi oyaa lia item mejangjateta nisungtem yagi lendong agütsü, ta Pakistan osangkaket, Dawn nung shia lir.
Injang akahertem mejangjaka aser Zadran dak injang agi kechiba akaher memetetaka, iba tatalokba yagi 2009 küm Pakistan nung kiralongrartemi Sri Lanka team mena aliba bus amakba bilemteter.
Afghanistan osang ajanga ashiba agi, Zadran khasettsü merangba ya tang tasen masü.
Left-arm fast bowler, Zadran ya Afghanistan cricket team nungi international atema asayar tajungtiba rongnung ka lir.
Nelson, New Zealand nung 2015 World Cup asaya nung Scotland den asayaba mapang pai takokba run anguba ajanga ajaki pa kanga tushia ajungkettsü. Iba takokji par linük asoshi iba ama sabang tulu nung mezüng takok liasü.
Zadran-i tang tashi nung par linük asoshi One-day Internationals (ODI) 39 aser Twenty20 Internationals (T20I) 27 asaya lir
Honibar aonung atalokba dak sendakba nung Cricket Board (ACB) ano osang kecha magütsüi lir.