Mokokchung & Changtongya nung candidate shingaia monination file masü

Mokokchung, Jan 9 (TYO): Municipal aser Town Council election nung nomination masüba tesemtem atema State Election Commission-i nomination file asütsü anogo Jan 9, 2017 tashi atsülangtsü. Aji saka, Mokokchung Municipal aser Changtongya town council nung candidate shingaia nomination file asüba osang mali.
Tanüa Mokokchung aser Changtongya town na nung Ao Senden ketdangsürtemi anir likapur aser ward balala nungi lenirtemi anir nütsüng nübur aika adenshia nomination file mesüdaktsüi nokdangogo.
State election commission office-i Changtongya Returning Office (alternative)-ji Tuli town-i belentsü tetuyuba agütsü, aji saka, Tuli nung aliba likapur den Tuli town union-i ibaji nokdangba ajanga Changtongya RO-ji EAC Chuchuyimlang nung belena liasü. Aji saka, candidate shingaia nomination file asüi maru ta osang ka ajanga angazüker.
Municipal aser Town council dak sentakba maparen nung “Minister Nuklutoshi lenisüba nung tasa balala yanglua koba Aor anema inyakogo, ibaji Ao kini maremzükteter aser magizükteter, anungji, pa Ao litsü toktsür tangsa tang aotsüla”, ta Ao Sendeni tanü Jan 9, 2017 nü telemtetba ka agia metetdaktsüogo.
“Pa aser par telok dak lendong kar danga atalokra Ao Senden khuret masütsü”, ta Ao Sendenisa metetdaktsü. “Pai Aor anema inyakba atema taidok meshitsüla “, ta Ao Sendenisa takangba ka metetdaktsü.
Ao Senden tetuyuba nung tanep 8:00 ako nungi nikong 3:00 ako tashi Mokokchung town ajak mokdanga nisung, gari kata mejaja aser dokan kata melapoki ghonda tenet town kanga azüngmeyaka liasü.
Jan 3 nungi tenzüka Jan 9 tashi nomination file mesüdaktsüi nokdanga aruba mapang Mokokchung town likapur, Mangkolemba likapur, Changtongya likapur aser Tuli likapur aser town balala nung ward lenirtemi anir nüburtem, tzükong trok nungi lenirtem, Ao Kaketshir Mungdang, Ongpangkong Kaketshir Mungdang, Mokokchung Town Lanur Telungjem aser temulunger shinokisa amalitepa nungitba den tenla balala agi yaritepogo, parnok ajak dang Ao Sendeni pelaba metetdaktsüogo.
Ao Senden federal Assembly jateper
Municipal aser town council election dak sentakba nung tongtibang onük tejembitsü aika alinung, Jan 11, 2017 nü, anepdang 10:00 ako nungi tenzüka Ao Senden Federal Assembly senden ka Senden office nung amentsü jeteper, ta Ao Senden sangdong ka ajanga metetdaktsüogo.
Anungji, federal unit ajak nungi züngsem ajak medema arutsüla aser iba sangdong dak alaka tanga shiti balaka meyoktsü, ta Ao Senden ketdangsürtemisa metetdaktsüogo.