Saudi Arabia-i Vibrant Gujarat atema teshimtet nübo ka yok

Ahmedabad, January 10 (Agencies) : Alima nung takar linük ka- Saudi Arabia-i India den shishilembatsü atema tesentaktep nung temulung agütsüba sayua Mongulbar nungi tenzükba Vibrant Gujarat Global Summit nung par linük nungi kanga dang temaba jenjang nung shimtetba telok ka dendar.
Saudi nung züngsem 20 agi akümba telokji Saudi-India Business Council Chairman Kamal S. Al-Munajjed lenisüba kübok shilem agir aser parnok rongnung real estate, investment banking nungi anir oil & gas, power, telecom aser agriculture wadangtem nungi mongin nisungtem dena lir.
Iba osang ya New Delhi nung aliba Saudi embassy ajanga metetdakja liasü aser teshimtet nübotem rongnung Saudi Arabian Government Investment Agency (SAGIA) Director Imad A. Al-Abdulqader aser tanga tongti ketdangsertem lir.
Vibrant Gujarat Global Summit nung adenba tenüng nung Saudi Arabia-i Bodbarnü linük shisatokden sentong ka ayongzüka agitsü. Iba sentong nung o jembirtem rongnung Saudi Arabian Ambassador Saud Al Sati adentsü.
Taküm Vibrant Gujarat Global Summit nung linük 12-i US, UK, Australia, Canada, Denmark, France, Japan, Netherlands, Poland, Singapore, Sweden aser UAE temi yariteptsü mulunga agizükogo.