Barack Obama-i tatembangba Tir osang nung salem ashi

Washington, January 10 (Agencies) : Mongulbarnü US Tir Barack Obama-i Chicago nung Donald Trump-i election nung takok anguba ajanga aoksar alirtem ajungmesotsüsa tepila o ka jembia salem shir pa Tir inyakyim anenogo.
Obama-i tesüsa küm ti tejakdang pai Tir mapa agizükba tesem anasa pa intetba jila-i temeshi aieni aoer amai Air Force One semdangtsü.
Pa den pa kinungtsü, First Lady Michelle Obama, linük Tatong Tir Joe Biden aser kinungtsü Jill Biden nungera dena aotsü.
Trump-i Obama amatokdaktsütsü tebilemba lir aser ajaklen nungi pa kanga luja jembiogo.
2016 election nübuyim mapa ajanga US democracy atema tasüngdangba aika adokogo.
Trump-i election nung takok angubaji Russia teka aitba ajanga lir, ta US intelligence temi tai tonglokja liasü.
Democrats telok ket nungi White House, Senate aser House of Representatives den statehouses timbaka ajuzükaogo aser tang parnok telong tentettsü kanga meranga inyaktepdar. Obama-i tarutsü nung parnok rara tasentem atema renemshiba nung yaritsü imlar.
Speech zülur Cody Keenan-i, pai Trump anema mejembitsü saka linük koda aotsü iba indang jembitsü. Pai linük nübur ka ama jembitsü,” ta AFP osangbenertem dang ashi.
“Trump indang politics tamajung ajanga arishi küm 55, tain Obama Tir menden nungi alutsü aser iba sülen inyaktsü sentongtem yimsaa yoker,” ta pai ashi.
Obama-i Tir mapa inyakyim tajungtiba nung kanga junga melenoktsütsü bilema liasü saka pai January 20, 2017 nü iba mapa Trump nem melenoktsütsü saksaker asütsü amai bilemer.
Obama kübok inyaker aika joko anisüngzüktsü tebilema liasü ajisüaka parnok ano tanaben politics dangi meyiptsü sentong yangludar.
Yimya ka ama küm shia Senate nung khen azüngba, o long 7,641 keta aliba, Washington tatem osang nung telemsa aser bendanger tashi agi manisadaktsütsü tekümdangtsü shia lir.
“Pai Chicago kechiba shimtet süra Chicago ji pa intetba tesem tang masü saka pa tetsüng tentetba tesem lir aser tang pa linük Tir nungia iba tesem nung oa anentsü,” ta Keenan-i ashi.