Naga nunger ajak longjemer loktiliba yanglushitsüla : Prof. Lanunungsang

Dimapur, January 10 (TYO) : Mongulbarnü NEZCC Amphitheater, Stone Garden nung Ao Kaketshir Telongjem Diphupar (AKTD) küm 25 jungmung sentong nung tesüiba mapang Pro-Vice Chancellor, Nagaland University, Professor A. Lanunungsang tongti o jembir jaoka mungogo.
“Nüchiba asoshi longjemer” omen nung ajemdaker jembiba mapang tongti o jembir, Prof. Lanunungsang-i, asen Naga lokti dena asenok aliba lima tanü telemsa agi sünga lir aser ibaji ajanga telongjem aser ochi samadaktsür. Naga nunger ajak longjemer asen lokti teraksa maliba lokti ka küma yanglushitsü mapang tongja tongogo, ta ayongzük.
Pai, AKTD küm 25 ajungba tenüng nung Diphupar lanurtemi telongjem atema inyaktsü ayongzük aser asenok longjemer ochi nung nokdakra asenoki tetsükdaktsü ajak nungpoka otettsü aser asen nükjidong tongtettsü, ta shisem.
MLA, Kuzholuzo Neinu (Azo)-i, Jubilee ya tangatetba tajung agi akangjungshitepba aser taitok agüja tejashitep ajak amatoker tesendaktep yanglushiba mapang ka lir, ta ashi.
Pai, joko küm ishika asen Naga lokti nung ‘akangjungshitepba’ olong ya tangatetba tailen amshia arur. Ajisüaka asenoki item aibelen nungi melenshidi kechiba süra aibelen ajangshir melenshiba agi asenok tajungba akümer. Asenoki iba kasa aibelen joko mebenshili aser lenmang teindanglen nungi Naga nunger telongjem tashi itshidi, ta ashi.
Naga nunger ajaki Khrista dak amanger kaka ama asen tamangba agi tuyuba nung anidaka taitok agütsütepa tejashitep ajak amatoker asenok tsüngda telongjem adokdaktsüdi, ta paisa ashi.
Iba sülen pai jubilee nüngo kaket-a sayatsü.
Parliamentary secretary, Irrigation & Flood Control, Jacob Zhimomi-bo koda masüba tongtibang mapa kar ajanga sentong nung atatsüba ama arua medentet, ajisüaka pai ashitsü aliba o pa indang personal secretary (PS)-i telok dang zünga metetdaktsü.
ASTD Chairman, Latong Pongen, DNSU president, Kumlamo Patton aser AKTD president, Lanutoshi Aier, president, AKT Dimapur nunger tepela o tatsütsü jembi aser mezüng AKTD Tir Moayanger-i AKTD tenzüka aruba otsü lemsatep.
Sentong nung menden okila AKTD Tir, Tangit Jamir-i jembi, aser Jubilee choir o Christian Education Department, ABCD teloktemi ken ajanga shilem agi.