RBI-i masü saka Modi-i telemtetba agir: Amartya Sen

New Delhi, January 11 (Agencies): Taoba mapang RBI Governor ana- Y V Reddy aser Bimal Jalan nati RBI tashi temeten wazüka ayutsü atema jembiba sülen tanüa Nobel Prize angusang, Amartya Sen-i Reserve Bank of India (RBI) aitsüba olen ka nung, tanübo Central bank-i telemtetba kecha magir saka telemtetba ajakji Ato kilonser, Narendra Modi-i agir, ta ashi.
‘Demonetisation’ aija Sen-i, demonesitation ajanga black money manentsütet, ta ashi.
India Today TV interview ka nung Sen-i, “Ato kilonseri black money anentsütsü atema langka inyakdar ta nüburtemi bilemer. Modi-i maneni teratatsü nungi tajangzük agir. Takartem timtemdar ta asübaji nüburtem atema tagizüktettsü ka lir ta amanger,” ta ashi.
December 30, 2016 sülenbo sen tejen melenba anentsütsü atema RBI-i telemtetba agiba aija Sen-i, “Iba ya RBI-i agiba telemtetba ka masü ta ni bilemer. Iba ya Ato kilonseri lemtetba asütsüa akok. Tangbo RBI-i telemtetba kecha magir ama bilemer,” ta ashi.
Yaküm November 8 nü Ato kilonser, Modi-i linük nüburtem den jembidang, December 30 nü tashi nung sen notes tejen deposit mesütetertemi March 31, 2017 nü tashi nung Reserve Bank of India office temi oa declaration form ka agüja deposit asütsü akok, ta metetdakja liasü.
Maneni Sen-i, Raghuram Rajan RBI Governor asüdangbo RBI-i nija tashi amshia liasü. Iba nungji I G Patel aser Manmohan Singh nungeri tenzük, ta ashi.
Tamalen RBI Governor ana- Reddy aser Jalan natia RBI indang nija tashi wazüka ayutsü atema jembia liasü.
Sen-i, sen shilem 86 melenba ajanga black money ishika, shilem 6 anentsütsü atema sorkari inyakba ajanga süngmanger, ta ashi.
Demonetisation ajanga sen taila anentsür ta sorkari jembiba dak sentakba nung Sen-i, ibaji kodanga tebilemtsü ka maliasü, ta ashi.
“Sen tailaji India nung kodanga tebilemtsü tuluka maliasü. Linük rongsenkettsüng timtemdaktsütsüsa sen tailaji tebilemtsü ka masü,” ta Nobel proizü angur, Amartya Sen-isa shisem.
Demonetisation telemtetba ya telok tila kati agi, parnoki iba telemtetba magidangyongi state sorkartem den asüngdangya asutsüla asü, ta pai ashi.