Global warming: Japan nung coral reef shilem 70 bleaching agi tepseter

New Delhi, January 12 (Agencies): Global warming ajanga tzüyim tatsükba akümba yong Japan nung coral reef tulutiba shilem asemsü nungi anasü samaogo, ta osang tasen ka ajanga bushitetogo.
Japanese environment ministry osang ajanga ashiba agi, Okinawa nung Sekisei lagoon shilem 70 bleaching agi tepsetogo.
Tzü tatsük akümba ajanga coral bleaching adoker. Coral bleaching ajanga coral reef tem nung ‘photosynthetic algae’ tem tilala samaa oadoker, aser ibaji ajanga sentsü ajunga tanemi sama aoer aser temesüng dang akümer.
Yaküm June nungi September tsüngda Japan nung Sekiseishoko coral reef temeket tzü temperature ji akhidang nungi degree ka-ana agi teimba aküm.
Yaküm mei mapang Northeastern Australia, Queensland tzüküm nung aliba Great Barrier Reef nunga iba kesa tatalokba ataloka liasü, ta osang ajanga metetdaktsü.
Coral reef tem ya tzü nung aliba shiruru tilatemi yangluba tesem ka lir, koba nung nutrients kanga ishika dang lir. Alima ajunga nung tropical aser subtropical tzüyimtem nung iba ya angutsü.
Tzüyim nung tzü temperature ya akhi ama meyipa marura coral tem süadoktsü.