Manipur police-i NSCN(IM) pur pezü apu

Imphal, January 12 (Agencies): Manipur commando temi Thoubal district kübok tesem balala mita aodang NSCN(IM) pur nisung asem aser parnok pusemer ka puogo, ta police ketdangser kati Brehostibarnü metetdaktsü.
SP M Pradeep-i anir police commando-temi yashinep 3:00 ako meta Tuisem yimtsüng nung mita bushiba mapang, kulikaket tejangja magütsüteter nisung tenet pua liasü aser parnok rongnung nisung asembo tamalen NSCN(IM) züngsem liasü, aser parnok ajak Pallel Police station nem jangjashitsü asoshi agütsüogo, ta ketdangserisa ashi.
Iba operation nung SSBL prangpong pezü aser ano tanga prangpong ka nguteta liasü.
Ano Thoubal district kübok Khangshim yimtsüng nung yashi mita aodang NSCN(IM) pusemer ka aser captain ka pua liasü.
Tenaji Hongsha 32, aser Captain Ashang Hongsha, 42 lir ta jangjaogo, tenaprong kesa yimtsüng nungi liasü. Hongsha ya Dimapur nung aliba Hebron Camp nung alir telungpurtem den teti tongtepratepa liasü, ta ketdangserisa shisem.
Commando temisa .38 pistol ka, injang pezü aser mobile handset ka ngutet, ta police tanishiri metetdakja liasü.
Ano tanga tatalokba ka nung Police telok kati Serou tesem mita aodang kesa telok nungi züngsem ana, Bungdon Bingham, 29 aser Setlun Shungjong, 23 na apu aser tena ket nungi .32 pistol ka nung injang inoker ngutet, ta police ketdangserisa metetdaktsü.