Municipal/Town Councils election nung amalitepdaksüner: Angh

Dimapur, January 12 (TYO): Tanü Raj Bhavan nungi sangdong ka ajanga Nagaland Agh, P.B. Acharya-i stakeholders ajak dang February 1, 2017 nü agitsü aliba Municipal/Town Councils election junga agitettsü atema ketdangsertem den amalitepa inyakdaktsüner, ta metetdaktsü.
State nung tetsürtem nem menden 33 lemzükja Municipal/Town council elections agiba ajanga joko Nagaland-a tanüngba linük den adentsü, ta sangdong nung shia lir.
“Tetsürtem nem menden 33 wazüka yutsüba ajanga tetsürtem nem tashi agütsüba dang masü saka India nung lenla aisü nung loktiliba melenshitsü,” ta Angh-isa ashi.
“Municipal/Town Councils atema election ji peipei Town aser Ward nung democracy yimya nung züngsemtem shimba maparen ka dang lir. Asenoki Municipal/Town Councils shimtsü atema mapang tongogo, kechiyong ibaji ajanga sanitation, tzü tajemtsü temerük aser anema alitsü atea maongka balala aika angutsü. Tetsürtemii tongtibang shilem ka agitsü aser Angh-i stakeholders ajak dang ozüng den amalitepa inyaktsü ajunghsir,” ta sangdong nung shia lir.
Angh-isa, ken o jembiba ajanga dang tongtibang onük aika latettsü, anungji melungtet teloktemi ozüng kübok alitsü aser sorkari sangdongba ama Municipal/Town Council elections agitsü meladaktsüner, koba ajanga Nagaland indang democracy tangatetbatem kümzüka wazüka ayutsü, ta kasa sangdong ajanga metetdaktsü.