Bengaluru sülen David Guetta, Mumbai Concert athi

Mumbai, January 13 (Agencies): Bengaluru concert athiba sülen France nunger DJ David Guetta indang concert Mumbai nunga thiogo. Temelaba agiba tejangja kuli maliba ajanga police-i iba concert alitsü asoshi temelaba magutsü, ta osang ka ajanga ashi.
Sentong ayongertemi police dang nungi iba anogo atema temelaba magi, ta police osang ka ajanga metetdaktsü.
Karnataka yimtiba nung tetsür ka dak tim mesüi kongshiba ken o ajanga Brehostibar aonung akatsü aliba Guetta charity concert athi, ta sentong ayongertemi ashi.
#Guetta4Good show concert ya charity concert ka lir. Iba ya electronic tsüngsang benjung tulutiba Sunburn achayangertemi ayongba concert, aser iba nung ajangzükba sen ya sensaker tanurtem school azüngba nung teyari agutsütsü asoshi liasü.
“Onoki takok tashi iba concert akatsü asoshi merangdangogo saka kedangsertemi memolungba ajanga tesasatsüka iba concert athir,” ta Karan Singh, CEO, Sunburn-i Brehostibarnü ashi.
Ketdangsertem aser Guetta nungi temelaba tejangja agir iba concert tanaben agitsü asoshi sentong yangludar, ta Singh-i maneni shisem.
“Onoki osang tejangja tekaratiba nung agütsütsü, aser ticket alir alirtem ajak den Bookmyshow purtemi tanabuba jenjang atema osang sangoktsütsü,” ta sentong ayongertemisa metetdaktsüogo.
Bangalore nungi tenzüka Mumbai, Hyderabad aser New Delhi nung Guetta concert tem agitsü sentong renemer liasü.