Musharraf okadak nokdakdang security tashi tait aginer

Islamabad, January 13 (Agencies) : Hokokbarnü tesüiba mapang Pakistan Tir Pervez Musharraf-i Islamabad anti-terrorism court (ATC) ka nung temepishiba ka zülua agütsüogo. Pai Chief Justice Iftikhar Muhammad Chaudhry dena okatsür aser obendanger parnok nisung 60 tashi pua ayuba ken o atema Pakistan nung okadak nokdaktsü arudang security tashi tait nüngdaker, ta iba shidi nungji zülua lir.
Musharraf okatsür Akhtar Shah-i pa atema file asüba shidi nungji tesüiba mapang linük Tir memetetba tetsübutsü lendong nungi kümzüktsü asoshi tang aliba security tang nungi tashi taitba agüjang ta okadak dang shia lir.
Ashiba ama security tashi itshia maküm tashi Musharraf dang okadaki arutsü mashitsüla. Security aser temang timtem tebilemtsütem ajanga Musharraf okadak nokdaktsüji timtem lir aser pa mejaoktsüla, ta kasa shidi nungji zülua lir.
“Okadak tesemtem nung security kanga tashi mait aser ibaji ano tajungba maküm, anungji Musharraf atema security balaka lemzüktsütsüla,” ta shiti nungji bangdakpur dang shia lir.
ATC Judge Sohail Ikram-i iba shidiji meshia ayu aser Islamabad nung Inspector General of police aser home secretary na den yangji zülua aliba lemsatepogo. Iba ken o angadangtsü asoshi February 9, 2017 nü tashi thinenogo.
Yaküm December ita nung iba ken o tesüsa angadangba mapang ATC Musharraf dang ita ka tsüngda nung pasasa arua pudakjang ta tetuyuba agüja liasü. Pai ATC-i tuyuba ama atakteta yutsüba mapang tsüngda nung marura pa ozüng alema inyaker ka ta sangdongtsü metetdaktsü.
Musharraf-i ita pungu tashi okatsür aser obendanger parnok nisung 60 tashi pua yur parnok teniyaktsü tim meinyakdaktsüba ajanga Advocate Chaudhry Mohammad Aslam-i tesüiba mapang linük tir anema Secretariat police nung August 11, 2009 nü iba ken o benoka liasü.
Interior Ministry-i Musharraf tenüng Exit Control List (ECL) nungi intoktsü metetdaktsüba sülen pai yaküm March ita nung Pakistan toktsür Dubai-i ao.
Pai anema Benazir Bhutto, Nawab Akbar Bugti aser Ghazi Abdul Rasheed nunger tepsetba ken o benoka aliba dang masü saka ano linük nung November 2007 küm emergency sangdongba aser obendangertem pua ayuba atema okadak nokdaksa akümer.