Act East Policy: Ratan Tata, Mukesh Ambani nati Assam nung shishilembatsü jangrar

Guwahati, January 13 (Agencies): India sorkar Act East Policy, koba ajanga Asean linüktem den shishilembatsü lenmang yangludar, iba nungji rangloker Mukesh Ambani aser Ratan Tata nati Assam nung shishilembatsü jangraba lemsatepogo.
Brehostibarnü Gandhinagar nung Vibrant Gujarat Global Summit nung ‘Assam State Seminar’ alidang Assam nungi industry aser commerce minister Chandra Mohan Patowary dang India nung shishilembar rongnung temaba ana yagi tenati Assam nung shishilembatsü tejangraba shisema liasü.
“Ni Ratan Tata aser Mukesh Ambani na den global summit tenzükbanü sensaksemogo. Assam nung shishilembaba jenjang rasaa shiogo, aser tenapronglai Assam nung shishilembatsü tejangraba sayuogo,” ta Patowary-i ashi.
“India’s Act East policy atema Assam ya tamendakdak asütsü temsüa lir. Bangladesh aser Southeast Asian linüktem aika nung asenok tetsüng ajemoka shishilembatsü asoshi atatar,” ta Patowary-i pa okila nung ashi.
Maneni danga shishilembartema Assam nung shishilembanüra state sorkari nungita yaritsü ta nangzüka state-i arua shishilembatsü asoshi ajungshiogo.
“North east ya mapang talangka asoshi arrtsü ka ama dang bilema aruogo, saka tang Indo-Asean tesendaktep asoshi Assam ya shishilembatsü atema lenmang ka lir ta angatettsüla,” ta Patowary-i shisem.
‘Act East Policy’ atema sorkari northeast state tem nem temolung lemteta nungloktsüba ama Assam-i anir inyakdar, aser mapang tatsüka tsüngda Act East atema department balaka Assam nung tentettsü, ta paisa shisem.