Sorkari sepaitem timi anepalutsü tuyur

New Delhi, January 13 (Agencies): Hokolbarnü Home Ministry-i paramilitary force ajak dang sepaitemi ajangshiba timtem balala atema tekaraba nung inyaktsü tuyuogo.
Tawa sepai kati BSF sepaitem nem chiyungtsü kanga mejungi agütsüba indang sangdongba sülen sorkari iba mera agir.
Sangdong ka ajanga Home Ministry-i BSF, CRPF, CISF, SSB, ITBP, NSG aser Assam Rifles dang, sepaitemi onük kar atema metetdaktsüdangsa ibaji asüdangtsü aser tekaraba nung mera agia inyaktsüla, ta metetdaktsü.
Paramilitary force tenet dang, tang sepaitemi ajangshiba indang timtem balala asüngdangang aser marendaki item onüktemji benokang, ta ketdangsertem osang ka ajanga ashi.
Sepai ketdangsertemi timtem onük benoker sepai tilartemji amokmerena memerenshitsüla, ta tuyuogo.
Paramilitary forces dang, sepaitem timtem onüktemji e-letters ajanga agizükang ta tuyuogo, aser force katibo e-letter ajanga timtem onüktema agizük tenzükogo, ta osang angashir.
Ano külen Minister of State for Home, Kiren Rijiju-i sepai ajaki social media nung osang mashi meprokshitsüla, ta tekümdangtsü olen ka metetdaktsüogo.
“Linük security timtemi maitsü atema social media amshidang sepaitem dang kümdangtsü tuyuogo,” ta Rijiju-i osangbenertem dang ashi.
Tawa BSF sepai, Tej Bahadur Yada-i social media nung video ka ajanga, sorkari parnok nüngdaktem agütsür, saka ketdangsertemi ozüng alema itemji market nung yokdoker, ibayongji sepaitem timtemer, ta sangdonga liasü. Paisa sepaitem nem chiyungtsü mejungi agütsüba lemsatepa liasü.