Hybrid Movement pur official promo dance video tangok

Hybrid Movement tentetsang Ekon den par züngsem kar noksa nung angur.

Mokokchung nung aliba tsüngsanger telok ‘Hybrid Movement’ pur Honibarnü yangi Shilu Park nung parnok indang official promo dance video ka tangokogo. Iba ya par telok asoshi mezüngbuba promo dance video asütsü.
Sorkari music, fashion, tourism aser ano tanga luyim balala ajungketba maparen inyaker saka tsüngsangba tsütsübo temulung kangara agütsüba mangur. Anungji tanga entertainment sector amaji tsüngsangba luyim nunga temulung agütsütsüla. Kechiyong tsüngsangba yaa tanga entertainment amaji kasasa tongtibang lir ta onoki amanger, ta Hybrid Movement tentetsang aser Director & Choreographer Sp. Ekoni osangbenertem den jembidang lemsatep.
Onok indang dance promo video yagi dance jangrartem ajungshitsü aser iba ajanga asen lima tsüngsangba tsütsü tali meteta akümtsü imlar, ta paisa ashi.
Naga nunger dak tsüngsangtsü sempet lir, aji saka, sabang aser nüngdakbatem peria maliba aser manguba ajanga asenoki tangar den metoktepteter. Asen lima dance class amala alitsüla aser tesayur tajung nüngdaker, ta paisa shisem.
Hybrid Movement ya 2014 küm tenzük aser iba telok nung züngsem 12 lir. Saka par züngsemtemji kar bendanglen azünger aser karbo tangalen mapa inyakertema lir. Tang Mokokchung nung alirtemji par pungu dang lir.
Parnoki 2014 aser 2015 nung Mokokchung nung lanurtem nem sabang lapokja tsüngsangba sentongtem ayongzüka kaogo. Par telok yagi salsa, hip-hop, jazz, tango aser ano contemporary dance-tem sabur.
Hybrid Movement tentetsang Sp. Ekon ya lanur ka dang aser pa ya Hyderabad nung Pride Events nungi dance training agiba nübu ka lir. Pa ya 2014 Hornbill Dance Competition nunga finalist ka liasü aser kasa kümji Dance India Dance nunga tetokteper rongnung ka lir.
Tanü tangokba hybrid movement indang official promo dance video reprangnürtemi hybridmovementnagaland (youtube), hybrid movement dance team & event organizer facebook group aser tang social media balala nung anogo ishika tsüngda nung angutsü.