Party tem dang nungi sen agiang, saka AAP nem vote agüjang: AAP

Jalandhar, January 14 (Agencies): Tanü Aam Aadmi Party (AAP) tongti, Arvind Kejriwal-i Punjab nung vote agütsütsüpurtem dang, tanga yimtenren party temi agütsüba sen agiang, ajisüaka AAP nem vote agütsüba ajanga parnok ashiokjang, ta ashi.
Iba ama mesükba o ka jembiba atema Goa Election Commission-i Kejriwal dang tekümdangtsü o ashiba sülen anogo ishika tsüngda pai ano maneni tashishitsü o jembiogo.
Honibarnü Punjab, Jalandhar yimti nung election nüboyim sentong ka nung jembidang Delhi Chief Minister, Kejriwal-i, “February 4 nü state nung assembly election agitsü. Party ajaki nenok nem sen agütsütsü. Ibaji agizükang, saka AAP nem dang vote agüjang,” ta jembi.
January 9, 2017 nü Goa Chief Electoral Officer, Kunal-i, “Kejriwal-i nüburtem dang vote atema sen meshiang ta jembiba osangji ni nguogo, anungji ni iba osangji Election Commission of India nem agütsütsü,” ta metetdakja liasü.
Ajisüaka yashi tashi nungbo iba osangji EC nem magütsü.
“Onoki Kejriwal-i jembiba onük ajakji District Election Officer (South) dang agüjang ta shiogo, saka parnok dang nungi osang agizüka mali,” ta paisa ashi.
Yashi Goa yimtiba, Panaji nung osangbenertem den jembidang Additional Chief Electoral Officer, Narayan Navti-i, “District Election Office-i Kejriwal-i jembiba onük indang CD ngua mali, ibayongji parnoki iba osangji (EC of India nem) magutsü,” ta metetdakja liasü.
Taoba Honibarnüa Benaulim constituency nung election nüboyim sentong nung ka nung jembidang Kejriwal-i, “Congress mesüra BJP candidate temi sen agütsüra meshiang,” ta ajungshia liasü.
“Ibaji agizükang, kechiyong ibaji nü meyong sen lir. Parnoki sen magütsüra parnok indang office-i oa meshiang. Ajisüaka vote agütsüdangbo AAP candidates nem vote agüjang,” ta paisa jembia liasü.