BJP-i Election Commission nung Rahul anema ken o agütsü

Lucknow, January 14 (Agencies): Tawa Supreme Court-i tetuyuba ka ajanga tamangba yimsü mesüra kinkidong nung ajemdaker vote mayimtsü metetdaktsüba nung ajemdaker tanü BJP-i state Election Commission nung Congress tatong Tir, Rahul Gandhi anema ken o ka agütsüogo.
Rahul-i, pai par party temaitsü nung tsüngremtem aser temeshi nisungtem noksa angur, ta jembia liasü.
Taoba mapang MLC, Shayam Nandan Singh leniba nung BJP nungi teshimtet telok kati state nung Chief Electoral officer(CEO), T Venktesh ajurua pa dang Congress lenir aser par party nem temerenshi agüjang, ta mepishi.
Parnokisa CEO nem Rahul Gandhi-i jembiba onük video ka agüja, ibaji tawa Supreme Court-i tuyuba anema lir, ta ashi.
“Rahul Gandhi-i Supreme Court tetuyuba anema inyakba dang masü saka Representation of the People’s Act 1951 kübok section 123 (3) alema inyakogo,” ta parnoki ashi.
Bodhbarnü party sentong ka nung Rahul-i, pai party temaitsü (tekabu) nung tsüngremtem noksa angur, ta jembia liasü.