RSS-i shinga anema meinyaker: Bhagwat

New Delhi, January 14 (Agencies): Honibarnü Rashtriya Swayamsewak Sangh (RSS) tongti, Mohan Bhagwat-i par tenteti shinga anema meinyaker, saka Hindu nunger longjemtsü aser tashi itshitsü atema inyaker, ta ashi.
“Onoki iba tentet ya kar anema inyaktsü asoshi tentet masü, saka onok tashi itshitsü atema tentet. Iba linük nung Hindu Samaj putiotsü tajung lir,” ta Bhagwat-i ashi.
“Kechiba Bangladesh nung Hindu nunger anema inyaker? Ibaji Hindu nung tai ajanga dang lir. Hindu nungeri iba tensa ajurur, kechiyong asenok longjema mali aser tashi itta mali. Shinga anema meinyaki asenoki Hindu Samaj longjemtsü atema inyaktsüla,” ta paisa shisem.
Kolkata nung RSS sentong ka nung jembidang Bhagwat-i item o jembia liasü.
Tang Bharatiya Janata Party (BJP) aser West Bengal sorkar tashi nung aliba party, Trinamool Congress na tsüngda sashia aitsütepba mapang ka nung RSS tongti leniri item o jembir.
Hokolbarnü Calcutta High Court-i Brigade Parade Ground nung RSS lokti senden akatsü atema RSS nem temelaba agüja liasü.
Iba anogo ka jakdang Kolkata Police-i iba lokti senden akatsü atema RSS nem temelaba magütsüi liasü.
Bodhbarnü RSS-i, parnoki police telemtetba anema high court nung temepishiba agütsütsü ta metetdakja liasü.
High Court-i, senden aliba tesem nung police peria lemzüktsüba den külemi tanga security-a agutsütsü, ta ashi.
Yaküm Centre-i sen tamshidak anentsütsü lemtetba atema Chief Minister, Mamata Banerjee-i sorkar sashia aija arudar.
Laisa, Modi-i aniba sorkari la aser lar party züngsemtem anema inyaker, ta aitsüogo.