Gandhi noksa ajanga sen jenjang makai kümdaktsü: Anil Vij

Ambala, January 14 (Agencies): Tanü Haryana state Minister, Anil Vij-i, Mahatma Gandhi noksa ajanga Khadi nung teyari magütsü aser pa noksa ajanga sen jenjang makai akum, ta jembiba sülen party aikati iba oji ashishia ola adok.
Opposition party temi dang masü saka par party, BJP lenirtemia iba oji aitsüogo.
Haryana nung BJP lenir tain, Anil-i mapang shia tashishitsü aketba o jembir aser pai, “Khadi indang Village Industries Commission (KVIC) calendar aser diary nung Gandhi noksa agi Ato kilonser, Narendra Modi noksa melenbaji junger, kechiyong Modi ji “brand” tajungba,” ta jembi.
Paisa, mapang ka nungbo sen nung aliba Gandhi indang noksaji-a agientsü, ta jembi.
Anil-i jembiba oji aija Mahatma Gandhi’er tanaben semchir, Tushar Gandhi-i, iba oji bangdak nungi jembiba lir aser minister jagi RSS-i jembiba o mesüka jembir, ta ashi.
Ano Congress-ia, “Gandhi ji tepsettsü akok, pa noksaji agientsü akok, saka paji India nunger tanela nung maneni alitsü,” ta ashi.
KVIC nung Modi noksa amshiba dak sentakba nung tasüngdangba ka langzüdang Ambala Cantt nungi ponguben tashi MLA, Anil-i, “Khadi nung Gandhi tenüng amshiba mapang nungi Khadi jenjang ajema kümogo,” ta ashi.
Paisa, “Sen notes nung kodang Gandhi noksa amshi tenzük, sen jenjang makai akum,” ta ashi.
Demonesitation sülen BJP sorkari kechiba sen nung Gandhi indang noksa maneni amshir ta asüngdangba langzüdang pai, “Tesülenbo ibajia agientsü,” ta ashi.
Congress otongdar, Randeep Surjewala-i, Modi’er sorkari British nungeri inyakba mesüka inyaker, ta aitsü.
“Modi, Anil Vij aser BJP-i iba ya bilemtettsüla- nenoki pa tepsettsü akok, pa noksa agientsü akok, Mahatma Gandhi mezüngmeshitsü akok, saka Gandhi ji India nunger tanela nung teti alitsü,” ta ashi.
Iba dak sentakba nung BJP otongdar, Shrikant Sharma-i, “Item oji (Anil-i jembiba o) onoki aitsür. Ibaji pa nija tebilemba otem lir,” ta ashi.
Haryana Chief Minister Manohar Lal Khattar-ia, ibaji pa nija tebilemba o lir aser iba nungji party maden, ta ashi.
Tesülen Anil-i iba o jangjashija, “Mahatma Gandhi dak sentakba o jembibaji kü nija tebilemba o lir. Nisung shinga melung meyirutsütsü atema ni kü o meyipa agir,” ta ashi.