Democrats aika Donald Tir akümba sentong nung madentsü

Washington, January 14 (Agencies) : Democrat nung congressmen aika taruba hopta Donald Trump Tir mendeni atuba sentong nung parnok madentsü metetdaktsüogo.
Arizona nungi yimsüsür Raul Grijalva-i, January 20, 2017 nü pa par constituency nung mazüngi alitsü aser pa Washington sentong nung madenbaji iba sentong mezüngshir agi masü saka America nunger nisung million aika akhüm metsübusang den tokteperba lir, ta ashi.
“Ni madenba ji office mesüra sorkar akhüm metsübuba agi masü. Ajisüaka America nunger nisung million sa million mezüngshisang dang mepelaba sayutsü mechi lir,” ta Grijalva-i ashiba The Hill osang ajanga metetdaktsü.
Georgia nungi mapang talangka congressmen ka ama inyaksang aser ajaki meteta aliba civil rights atema inyaker, John Lewis-a 1987 küm nungi tang tashi nung tan mezüngsüa iba sentong nung madentsü, kechiba süra Russia teka adenba ajanga Trump ji ozüngi melaba tsütsü nungi shimba lenir ka masü ta pai bilemer.
Illinois nungi yimsüsür Luis Gutierrez-a Trump Tir medeni atuba anogo, January 21, 2017 nü tetsürtemi Trump anema longkak aitba sentong nung adentsü renema lir anungji paa Tir menden melentepba sentong nung madentsü.
Trump Tir mendeni atuba nokdaktsü ta metetdaktsür yimsüsür rongnung mezüngbubaji Gutierrez lir.
“Asenoki meranga kümzüka ayuba tetsür, immigrant, aser nüburtem nüji anema Supreme Court nung obendanger tasen shimer inyaktsü alisang Tir akümba sentong nung ni madentsü,” ta pai ashi.
Ano Massachusetts nungi yimsüsür Katherine Clark, California congressman Jared Huffman aser Oakland congresswoman Barbara Lee nungeria iba sentong nung adentsü bilema mali ta shiogo.