US nung Mosque ka rongtoktsü, nisung ka apu

Washington, January 15 (Agencies) : Seattle yimti tezülen mosque ka nung mi senokja kanga mejungi rongtsü aser iba tatalokba nung police-i arishi küm 37 tain tabur ka apu, ta osangbenertemi metetdaktsü.
Iba miji asaa senoktsü ta kasa osang ajanga ashi.
Bellevue, Washington nung aliba Islamic Centre of Eastside nung Honibarnü shinga maliba mapang ka nung iba lendong atalok, ta Deobarnü kasa osang ajanga metetdaktsü.
“Mi den rarartemi iba mosque tesülen milak feet 40 tashi atuba angu. Parnoki iba mosque tesadang kashibo mi nungi kümzükteta liasü,” ta KCPQ osang ajanga ashi.
“Onoki iba ya asaa inyak ta osang tejangja ngutetogo, ajisüaka kechi tebilemba agi inyakar ano memjangja,” ta Bellevue Police tekolakba Steve Mylett-i ashi.
Tang pua alisangji Isaac Wayne Wilson ta jangjaogo aser pa dang asüngdangya südar, ta Mylett-i ashi.
Pa ya mosque tesülen ayong ayonga longdaka lia angu aser tang pa County Correctional Facility, Seattle nug anir puoka lir.
Iba ya yimsü anema inyakba mapa masü amai bushisüngdangertemi bilemer, ta osang ajangasa ashi.
Deputy prosecutor Mike Hogan-i, “Pa iba mosque den tesüiba mapang nunga mangatettep adoka meinba ajanga police-i pua liasü,” ta ashi.
American-Islamic Relations Council-i, “Tang yongi kecha mejembii liang. Bushisüngdangertem nem mapang agüjang,” ta Facebook nung post süa lir.
Bellevue Masjid nung mi lendong atalokba ajanga shibanga lir, ta kasa post nungsa shia lir.