BJP Mahila Morcha-i Congress aitsür

Imphal, January 14 (Agencies): Manipur nung tensa mejungi kümdaktsüba asoshi BJP Mahila Morcha-i tanü ruling Congress aija liasü.
Kin-o kin tsüngta temolung melemtep aser tesempatep tali adoktaktsüba ya BJP ajanga masü saka Congress mapa lir, ta Manipur BJP Mahila Morcha nung President, Sumatibala Ningthoujam-i ashi.
Sorkari Ukhrul nung mozüki merenem aliba ka lapoktsütsü merangba aser Sadar Hills ya full-fledged district kümdaktsütsü asoshi maparen inyakba anema UNC-i rongsenkettsüng mokdangtsü tenzüka lir.
Congress-i ‘divide and rule policy’ amshiba ajanga Manipur nung nüburtem tsüngda telemsa adoktaktsür aser district tasen ya küm asem-pezü tejaklen kümteter alitsü asü, ta Sumatibala-isa ashi.
Congress-i India nung yimsü asüba mapang UNC aser NSCN-IM) tesendaktep otsü mejembi.
BJP-i iba sorkar melenzüktsü, iba mapang UNC aser NSCN(IM) tsüngda tesentaktep lir ta Chief Minister aser Deputy Chief Minister-i sangdong, aser iba ama tejak ana atenba Congress telok inyakyim khukhua aitsür, ta Sumatibala-i maneni Congress telok aija ashi.
Congress-i state nung tang tensa tamajung nung yamai yimsü asüba asoshi temolung masüba paisa maneni ashi.
“BJP aser UNC külemi rongsenkettsüng mokdangba maparen ya inyaker, ta Congress-i shia yimtenren mapa inyaker. BJP-i aruyaa aliba election nung takok angutsü. Congress teloki menden 10 mesüra teküpokba angutsü,” ta paisa shisem.