Mirza nem Rajiv Gandhi Khel Ratna sempet agütsütsü akok

New Delhi, August 11 (Agencies): 2015 Wimbledon doubles champion, Sania Mirza nem Rajiv Gandhi Khel Ratna sempet agütsütsü asoshi lemtetba osang ka India sports ministry-i tanü Mongolbar nü metetdaktsüogo.
“Rajiv Gandhi Khel Ratna sempet agütsütsü asoshi India Sports Minister, Sarbanada Sonawal-i Mirza tenüng benokogo. Ajisüaka, la nem iba nungtu sempet agütsütsü mesüra magütsütsü telemtetbaji Awards Committee-i ang tatembangsüa agitsü,” ta Sports Secretary, Ajit Sharan-i tan August ita tetenzüklen metetdaktsü.
“Mirza tenüng benoktsü osangji AITA nungi monur ang angazük saka asen lenir, Sonawal-i iba onükji agizüka Mirza tenüng Awards Committee den benok,” ta pai shisem.
Mirza-i la den külemi asayala, Switzerland tsür Martina Hingis den külemi lungjemer 2015 Wimbledon tetsür doubles takok marok taküm June ita agizüka tan mezüngsüa doubles Grand Slam takok marok agizükba den külemi, tetsür doubles tarensen nung World No. 1 akümtsü jenjang tajung angu.
Tennis asayatsü tenzüker tanü tashi nung mixed doubles shilem indang Grand Slam takok marok 3 tashi agizüka alila, Mirza den külemi, Squash asayar, Deepika Pallikal aser Discus aoner, Vikas Gowda na tenünga iba sempet agütsütsü asoshi tenüng benoka lir.
Mirza-i taoba mapang, 2004 küm Arjuna Award aser 2006 küm Padma Shri sempet agizükogo.