Army temi social media timi amshitsüla: General Rawat

New Delhi, January 15 (Agencies): Deobarnü Army tongti, General Bipin Rawat-i sepaitem dang, social media ajanga pei tejashi onüktem melemsateptsüla, aji oda mesüra aibelenertem merenshitsü, ta metetdaktsü.
Army Day anogomung nung jembidang Rawat-i, “Külem tenzüker kari pei timtem lemsateptsü atema social media amshir. Ibaji ajanga sepaitem tanela kongshir,” ta ashi.
Sepaitemi tim lenmang ajanga parnoki ajangshiba timtem onüktem benoktsüla, saka social media nung item onük lemsatepra temerenshi agütsütsü, ta paisa shisem.
“Asen tembar kari parnok tejashi onüktem lemsateptsü atema social media amshiogo. Iba ya ajanga arrtsülen aliba sepaitem kongshir. Nai aibelen ka inyakba atema temerenshi angutsü,” ta paisa metetdaktsü.
“Cyber attacks anema inyaktsüsa asenok dak tashi lir, ajisüaka social media nung asenoki tsükchirtem anema kümdanga alitsüla, aser asenok kibongtem danga kümküma alitsü metetdaktsütsüla,” ta paisa shisem.
Hokolbarnü Army tongti-i sepaitemi ajangshiba timtem onüktem pa indangindanga atongtsü atema maparen ka tenzükba sangdongogo.
Tawa BSF nungi sepai ka aser CRPF nungi sepai kati parnok maparen nung timtem balala ajangshiba indang social media nung prokshia liasü.