Tashi mangaba candidate tem Dimapur nungi aridoktsü

Dimapur, January 15 (TYO): ULB elections mangatettep ken o atema Deobarnü Lotha Hoho Ki, Dimapur nung Naga Council Dimapur (NCD), Central Nagaland Tribes Council (CNTC) aser Joint Coordination Committee (JCC) külem senden ka menogo.
Tanü senden nung adenba Joint Coordination Committee (JCC) nung Ao Senso Telongjem Dimapur, Chakhroma Public Organisation, Lotha Hoho Dimapur, Western Chakhesang Hoho aser Western Sumi Hoho tem dena lir.
Tanü senden nung onüktem benoka olemtepba sülen tadenertemi, senden nung arua madenba candidate tem, talisa NPF candidate tem dang NCD tetuyuba ama tenüng meyipa agitsü atema tetuyuba agütsütsü lemtet.
Iba tetuyuba sülen manidakertem Dimapur telongtet nungi aridoktsü ta senden nungsa bangzünga renemogo.
Tanü senden nung arua adenba candidate temi, “NPF nungi candidate temi tenüng meyipa agira, parnokia meyipa agitsü mulunga lir,” ta tebilemba metetdakja liasü.
Senden nung adenertemisa Ward No. 18 nung Rongmei kintsür kati NPF tenüng nung tenüng agütsüba atema süoki ia bilema jembi. Iba dak sendakba nung NCD, CNTC aser JCC temi la dang tenüng meyipa agitsü atema tetuyuba agütsütsü aser ibaji meinyakra, teloki lemtetba ama la anema mapa inyaktsü bangzünga renem.
ULBs election nung candidate temi shilem magitsü telemtetba sülen manidakra, January 17, 2017 sülen NCD kübok public rally ka ayongzüka agitsü atema tanü senden nung adenertemisa telemtetba ka agi.
Külen, NPF-i yashi sangdong ka nung, State Election Commission-i sangdongba ama NPF-i ULBs dak sendakba maparen inyaka aotsü aser NPF ticket holders/candidate shirnoki tenüng meyipa agidir, temerenshi alitsü ta Naga Peoples Front (NPF)-i tetuyuba agüja lir.