NH-2 anasa anentsüh aluba ajanga ki 5 aben

Kohima, August 11 (TYO) : State yimtiba Kohima nung tzünglu kanga aruba ajanga tesem aika nung anentsüh ajanga timtemer aser tang tesüsabuba anentsüh alubaji Phesama yim anasa National Highway-2 nung lir.
National Highway-2 ya Kohima aser Mao Gate, Manipur sendaktepba lenmang lir. Kisama Heritage Village anasa anentsüh tulu aluba ajanga gari lenmang metre 100 shi anenzüka bener ogo aser ali maneni anenzüka bener aoba ajanga gari ka dang süitetter. Iba tesem nung BRO-i JCB ka yua lir.
Phesama yimtsüng anasa anentsüh aluba ajanga ki pungu abentsüsa aküm ta osang angazüker.
Tzünglu aruba manenra Phesama police check gate aser Viswema anasa NH-2 kanga mejungi anenzüka aotsü ana nung lir. Ibaji atalokra Southern Angami tesem atema dang masü saka Manipur atema tetsükdaktsü tulu ajurutsü.