China-i menoknok takzütetba satellite amenoktsü

January 18, 2017(Agencies): China-i menoknok aruba takzütsü asoshi taküm satellite ka amenloktsü. Iba satellite ajanga electromagnetic data tem bendentsü, aser iba teyari ajanga menoknok aruba takzütsü.
Mongolbarnü China earthquake administrative agencies ajanga ashiba agi, iba satellite taküm küm tom tashi nungbo amenoktsü.
Alima arakzüba ajanga electromagnetic radiation adokdaktsür, koba anüng nungi reprangteter. Alima electromagnetic field, ionosphere plasma aser high-energy particle tem data bendena China aser meketa aliba tesemtem nung menoknok arutsü aliba takzütsü asoshi iba satellite amshitsü.
Iba satellite ya China nunger atema anüng nung amenoker menoknok takzüba sabang mezüngbuba asütsü, aser iba ajanga maneni bushisüngdangtsü asoshi jenjang tasen lapoktsütsü.
Iba sentong asoshi deputy chief-i ashiba agi, satellite ya küm pungo asoshi orbit nung electromagnetic yimyatem mangaoka alitsü. China nung 6 magnitude tashi den tema anokba menoknoktem, aser alima ajunga nung 7 magnitude tashi den tema anokba menoknoktem mangaoktsü. Scientist temi iba ajanga alima ajunga nung temesüktep yimyatem angutsü, aser iba ajanga menoknok anokba takzüba technology tasen yanglutettsü imlar.