Guwahati RBI kima longkak aiter Congress züngsem 100 apu

Guwahati, January 18, 2017: Bodhbarnü Guwahati nung taoba Assam Chief Minister, Tarun Gogoi, state Congress party incharge aser party nung inyakertemi ‘demonetisation’ anema Reserve Bank of India kima longkak aitba noksa nung angur. Ajichilen noksa nung Security sepaitemi Congress nung inyakertem longkak aitba nokdangba noksa angur. 

Guwahati, January 18 (Agencies): Centre sorkari sen 500 aser 1,000 notes anentsüba ‘demonetisation’ anema Congress-i linük tesem aika nung Reserve Bank of India (RBI) office kima longkak aittsü ayongzükba dak sentakba nung Bodhbarnü Guwahati nung Congress nung inyakertemi RBI office kima longkak aitdang police-i Assam Pradesh Congress Committee (APCC) Tir aser Rajya Sabha MP, Ripun Bora na densema Congress nung inyaker 100 shi puogo.
Taoba mapang Assam Chief Minister, Tarun Gogoi, APCC Tir, Ripun Bora, AICC lenir CP Joshi nungeri anir Congress Party nung inyakertemi demonetisation anema longkak aitba den külemi anenja aliba sen notes ano menüngshitsü atema takhangba agutsü.
Longkak aitba mapang Congress nung inyakertemi security indang barricade raksaja RBI office telungi aitsü merangdang parnok aika yiru.
Tarun Gogoi-i, Centre sorkari demonetisation mera agiba ajanga democracy tepsetogo, ta ashi.
“Iba ya nüburtem anemba inyakyim ka lir. Modi’er sorkari democracy tepsetogo aser democracy asentenshitsü atema nüburtem asoshi onoki ola adoktsü,” ta paisa ashi.
Ano külen APCC Tir, Ripun Bora-ia, demonetisation ajanga India nunger rongsenkettsüng raksaogo, ta ashi.
Tesülen police-i pua aliba Congress züngsemtemji chioka liasü.