Naga nunger lokti nung telemsa aika adokba atema shisabulur : Azo

Dimapur, January 18 (TYO): Nagaland nung tang yimten aser lokti nung mepetmesü adoka aliba ajanga asen loktiliba nung telemsa aika adokdaktsüogo aser iba asoshi shisabulua bilemer, ta MLA, Khuzoluzo Neinu (Azo)-i ashi.
Bodbarnü Walford Dimapur nung Chakhesang colony lapoktsüba sentong nung Azo-i ashiba agi, Naga nungertem lemdangogo, Hoho tem lemdangogo, tebur aser tetsürtem lemdangogo, Sorkar aser NGO tem lemdangogo, asenok kwika lemsatsü, ta asüngdang.
Chakhesang colony nung kilen 100 shi lir aser iba ya Dhansiri ayongküm anasa lir. Sorkari iba yim tasen recognized süogo aser Chakhesang colony ji Rengma colony den atongtepa lir.
Phek nung ULB election atema candidate ki kar raksatsüba indang olen ka jembidang, iba tatalokba ajanga maaksü bener arutsüogo aser Naga nunger ajak dangi osang tai ka sangoktsüogo, ta Azo-i ashi.
“Chakhesang nunger ya yimjung meimertem lir aser temeten nung ammetertem lir saka yashi inyakba mapa ya tenük amor inyakba ka lir Tsüngremi asenok dang tai atoktsü aser tarutsü anogotem nung tensa tajungba küma aotsü imlar. Tangar kiojen raksatsüba ajanga telangzüba mangutsü, anungji ibala mapa meinyaktsüla,” ta paisa ashi.
Azo-isa takoksa angurtem dang tai atoktsü mepishia metetdaktsü. “Nenoki tatok agütsüra, na tebilemtsü abenba lennir ka ta tangari züngshitsü. Chichiba Khristan tangatetba nung asenoki kati ka akhümtsübutepdi aser meimtepdi” ta Azo-isa ayongzük.
Iba sentong nung Organisation Committee Convenor, Vetsosa Nyekha-i temeket aliba colony temi colony tentettsü temelaba agütsüba atema pelaba metetdaktsü.
Sentong nungsa Western Chakhesang Hoho, president Vekhosayi Nyekha aser Tenyemi Union Dimapur, president Khalo Kapfo nati o tatsütsü jembi, Chakhesang Dzuve Khrotho aser Venetolu Tureng nungeri shilem agi aser colony tenzüker rongnung ka, taoba MP, Rajya Sabha aser taoba minister M Vero-a aden.