Italy:Bus tsükokdang nisung 16 asü

Rome, January 21 (Agencies) : Italy anüdoklentip tsütsü Hungary nunger lanurtem mener oyaa aliba bus gari ka tsükoker mi atokba lendong nung tajemba agi gari nung mena alir rongnungi parnok nisung 16 süogo, ta Honibarnü mi den rarartemi ashi.
Hokolbar aonung Verona anasa atalokba gari lendong nung yirur, parnok nisung 36 tashi mozü kidang anir oa yaridar.
Iba bus yagi tongshi ka nung kanga sashia oa atsükba agi mi adoka iba lendong atalok, ta mi den rarartemi ashi.
Bus gari anisang aser par kinungertema iba lendong nung asür rongnung densema alitsü akok, ta Italy osangkaket nung shia lir.
Iba bus nung nisung 50 mena liasü aser item rongnung nisung timba ka Hungary nunger arishi küm 16 nungi 18 tsüngda pur liasü. Parnok ya school nungi France repranga jajar meyipa aoerba iba lendong ajurua liasü.
Tang police temi mi agi rongsar aliba bus gariji kanga junga mita reprangtsü atema ozüng amertem tetuyuba atatepdar.