Japan Ambassador-i Assam CM ajuru

Guwahati, January 21 (Agencies): Honibarnü Japan Ambassador to India, Kenji Hiramatsu-i Assam Chief Minister, Sarbananda Sonowal ajurua sen intoka shishilembatsü maongka balala densema onük aika nung o lemtepa liasü.
Iba mapang nung Sonowal-i Japan nungeri sen intoka shishilembatsü atema takoktsü lenmang aika metetdaktsü aser ‘anü adokba lima’, Japan-i Assam nung organic sector, power distribution aser transmission sector nung state sorkar den senteper inyaktettsü lenmang lir ta metetdaktsü, ta sangdong ka ajanga ashi.
Kasa sangdong ajanga ashiba agi, “Japan aser Assam nati tesentaktep aintsü atema olen kar metetdakja Sonowal-i, Brahmaputra ayong ponglang merüktettsü aser skill development Centres lapoktsü atema Assam o Japan nati longjemer inyaktsü akok ta shiogo.”
Chief Minister-isa mapangshia shisaliok, sobaliba aser saisapong lemsatepba sentongtem akatsü süoka jembi, aser ibaji Japan ketdangseria mulunga agizük, ta osang angazüker.
Kasa senden nung Japan ambassador-ia süngo, aluyimba, horticulture, tourism, chiyungtsü wazüka ayuba ama organic sectors aser mapangshia kaketshirtem exchange programmes aliba ajanga Assam den tesendaktep tashi itshitsü tejangraba lir, ta ashi.
Hiramatsu-i Sonowal Japan-i jaok aser Chief Minister-ia ibaji pelaa agizük.