Manipur nung Cong sorkar atsüngdoktsü: BJP

Tura (Meghalaya), January 21 (Agencies): Honibarnü BJP-i, Manipur nung taruba assembly election nung parnoki Congress sorkar atsüngdoktsü, ta temulung lema jembiogo.
Northeast state tem aser Jammu & Kashmir atema BJP National general secretary in-charge, Ram Madhav-i, “Ita ka lir sülen, ochimashiba sorkaar aser terenlok makadaktsüba Congress sorkar aser Okram Ibobi Singh (CM) atsüngdoktsü atema Manipur nungeri maongka angutsü,” ta metetdaktsü.
Madhav-i ashiba agi, Congress sorkari par nisungtem atema bilema mali.
BJP-i state election nung menden 60 prongla nung tanga party den meloktepi tokteptsü ta tamalen metetdakja lir.
“BJP-i Naga People’s Front aser National People’s Party (NPP) den melokteptsü, item party ya Centre nung NDA sorkar denbo lir,” ta paisa ashi.
NPF aser NPP-ia constituency kar nung candidates toktepdaktsütsü.
Meghalaya, Garo Hills region nung party regional office semzüktsüba sülen party nung inyakertem den jembidang pai item o metetdaktsü.
Pa den BJP national otongdar aser Meghalaya nung party in-charge, Nalin Kohli aser BJP Meghalaya Tir, Shibun Lyngdoh nata liasü.
“Ibobi Singh-i maneni pei atema bilemba aser meimchir dak mapetba mapatongtem benoker. Manipur nüburtemi ibaji rajemogo, aser tang nungi tenzüka ita ka ser tesadang nung ibaji jungkai adoktsü ta ni amanger. State-i terenlok makadaktsüba sorkar ya atsüngdokba nenoki angutsü,” ta Madhav-isa ashi.
Tang state nung rongsenkettsüng lenmang mokdanga aliba onük nung Chief Minister Okram Ibobi Singh maneni aija BJP lenirisa, “Manipur nung mokdangba ya pa (Ibobi) tai ajanga lir, kechiyong iba nungjagi pai yimtenren tsütsü tajangzük angur, aser tanü ni iba taiji kü nija khuret agia ashir,” ta metetdaktsü.
“Election agitsü ita ana jakdang state timtemi aitsüsa Ibobi-i yimya balaka nung inyak tenzük. Iba mokdang ya kanga tia maka, aser iba mokdang tenzüker teloktemi iba ya anener lila, ajisüaka Chief Minister-i iba timtem atema meinyaktet,” ta paisa ashi.
Pai ashiba agi, Centre sorkari state nem security sepai tali agütsüsemba densema nüngdakba teyari ajak agütsüogo, ajisüaka Chief Minister-i iba mokdang manentsütet.
“BJP-i dang Manipur nung mokdang maliba sorkar ka agütsütettsü aser terenlok atema inyaktettsü,” ta paisa shisem.