Rooney-i Bobby Charlton indang otsü ajatetogo

January 21, 2017 (Agencies): English Premier League (EPL) Honibarnü Manchester United aser Stoke City tsüngda asayaba nung telok anaprong nungi goal 1-1 agütsü, saka Manchester United nungi Wayne Rooney-i otsü tasen ka yangluogo. Kasa England team nungi Bobby Charlton-i Manchester United nungi asayaba mapang goal 249 agüja otsü yanglua liasü, aser iba otsü Rooney-i yanglushiogo.
Küm 31 tain Rooney-i United nungi match 546buba asaya nung free kick metsüngdang goal yokba ajanga, 1966 World Cup akokdang kanga junga asayasang, Charlton-i yanglua aliba otsü melenshitsü.
“Ni iba club-i arudang iba amai asayatettsü mebilem. Ni kanga pelar. Iba club nungi goal timba agütsür akümba ya ni asoshi konang tulu lir,” ta pai ashi.
Rooney ya Everton nungi 2004 küm aru aser pai tang tashi nung Manchester United nungi asayadang goal 250 agüja lir.