UP assembly election atema Congress aser SP loktepogo

Lucknow, January 22, 2017: Deobarnü Lucknow nung Samajwadi Party Tir aser Uttar Pradesh Chief Minister, Akhilesh Yadav den pa kinungtsü, Dimple Yadav aser party nung lenirtemi party office nung taruba state assembly election atema election manifesto sayaba noksa nung angur. 

Lucknow/New Delhi, January 22 (Agencies): Taruba Uttar Pradesh assembly elections atema Congress Party aser Samajwadi Party na senden aika mena jembiba sülen tatemsa Deobarnü party ana longjemogo.
Congress Party osang ka ajanga ashiba agi, taruba UP election atema parnoki menden 104-106 shi angutsü.
Ajisüaka Congress-ibo menden 120 aginüa liasü, ta osang ka ajanga ashi.
Uttar Pradesh nung sorkar tashi nung aliba party, Samajwadi Party-i Deobarnü assembly menden 403 nungi parnoki menden 298 nung tokteptsü aser par teloktep, Congress party nem tanüngba menden 105 agütsütsü lemtet, ta party osang ka ajanga ashi.
Iba sülen tanep Congress Tir, Sonia Gandhi’er jala, Priyanka Gandhi Vadra aser Uttar Pradesh Chief Minister, Akhilesh Yadav na phone ajanga jembia liasü.
Congress atema election sentong asameyangtsür, Prashant Kishor Lucknow-i oa Chief Minister aser SP National Tir, Akhilesh Yadav ajurua liasü.
Ano külen tanü Akhilesh-i par party election manifesto sayaogo.
UP nung züngsem 403 aliba House atema February 11 nü constituency 73 nung election agitsü, February 15 nüng constituency 67, February 19 nü 69, February 23 nü 53, February 27 nü 52, March 3 nü 49 aser March 8 nü constituency 40 atema election agitsü.
Iba sülen March 11 nü vote azüngtsü.
Yashi tashi nungbo UP CM, Akhilesh-i Congress nem menden 99-100 tashi dang agütsütettsü ta jembia liasü, ajisüaka Congress-i menden 105 meshiteta tatembang telemtetba ka dangi aru.
UP nung sorkar akumtsü atema BJP atema tongti tetokteper party anaji SP aser BSP na lir, ajisüaka SP-i Congress Party den loktepba ajanga parnok jenjang ajungtsüa akok.