Trump-i taruba Hokolbarnü UK Ato Kilonser den ajuruteptsü

Washington, January 22 (Agencies) : Taruba hopta Britain Ato Kilonser Theresa May-i US semdangba mapang tang US Tir tasenba, Donald Trump-i la den ajuruteptsü, ta Honibarnü White House nung Press Secretary, Sean Spicer-i ashi.
Trump Tir mendeni atuba sülen pa den mezüng ajuruteper bendanglen nungi aruba lenirji May asütsü, ta osangbenertemi ashi.
Lenir ana tsüngda shishilemba tesendaktep tsütsü olemtep akatsü
Tawa interview ka nung jembiba mapang Trump-i, Britain European Union (EU) nung anenbaji temelenshi tulu ka asütsü, ta ashi.
Trump-i pa Tir mendeni atutsü hopta ishika lia Britain den shishilemba inyakyim ka kanga kara inyaktsü tezüngzütep agia liasü.
Pai, “Linük anaprong ajungtsü mechi aser jungjunga aser kanga kara tembangtsü mechi iba mapa meranga inyaktsü,” ta ashi.
Honibarnü Spicer-i, January 31, 2017 nüa ano Trump-i Mexico Ato Kilonser Enrique Pena Nieto dena senden ka amentsü sentong yanglua lir, ta ashi.
Trump-i, ni US aser Mexico na tsüngda arrtsülen nungi ozüng alema aruba migrant tem nokdangtsü mechi atsü atsüdangnüa liasü, ta ashi.