Manipur nung Republic Day atema mitkartem renemshir

Imphal, January 22 (Agencies): Telungpur agi sünga aliba Manipur state nung Republic Day tebor junga amongtsü asoshi mitkartem iba state nung tesem ajaklen kümkümshia nükdagi.
Mitkartemi Imphal yimti anükba den külemi police commando temi amang sangwa metitemi patrolling senzüa yimti nüktar.
Hokolbarnü Nagaram aser Tangkhul Avenue tesemtem nung police commando temi ki ajak mita bushiba mapang, tetsür pezü densema nisung ter dak tali apu aser parnok ajak Lamphel police station nung jangjashitsü asoshi agütsüogo, ta mitkartemi metetdaktsü.
Raj Bhavan, CM aliba ki, minister tem aliba ki, legislator aser sorkar ketdangsertem aliba ki, state sorkar nung department balala indang headquarter, shishilembaba tesemtem aser central sorkar indang office balala amenloka aliba ki ajunga nung mitkartemi tanükba agütsüdagi.
Brehostibar aonung Churachandpur district nung Assam Rifle aser Manipur police külemi mita aoba mapang, ozüng alema prangpong yangluba tesem ka ngutet. Iba mapang prangpong bener ajener tetsür ana apu, aser pistol trok den prangpong yangluba osettem aika S Kotin yimtsüng anasa ngutet.
Manipur asoshi nüchiso bushir telok balalatemi mapang talangka nungi mitkartem amakba ajanga mitkartem aser nüburtem aika tepseta aser yiruja arudagi.
Republic Day aser iba amala tongtibang anogotem nung telungpurtemi yimti nung bomb poklokja lendong balala agüja arur.
Imphal nung assembly constituency tenet aliba municipal tesem nungi Armed Force (Special Power) Act (AFSPA) agiena lir.
Manipur state tenteter küm 45 ajungba benjungmong sentong Secretariat Complex nung alidang, Chief Minister Okram Ibobi Singh-i linük nung terenlok balala takok ngua bener aruba, sentong nung adenertem dang shia liasü aser linük nung telungpurtem dang azütokshi anener sorkar den ajurutepa yimjung asoshi jembitsü ajungshia liasü.