Chapecoense tayimtsü tsükokba nung kümzükertemi Copa Sudamericana trophy agizük

Chapeco, January 22 (Agencies): Ita ana tejakdang Brazil Chapecoense soccer club pur tayimtsü tsükokba nung par asem kümzük. Honibarnü par asemi par medemer tasürtem, aser club tenüng nung Copa Sudamericana trophy agizükogo.
Club nung züngsem tasen anioka team yanglushiba sülen, iba ya parnok asoshi mezüng asaya liasü. Iba charity asaya nung defending Brazilian champion Palmeiras den goal anana agüja asaya kasa nung tembang.
Goalkeeper Jackson Follmann shiba iba tayimtsü tsükokba nung kümzük, saka tetsüng ka rangdoktsüsa aküm, pai wleelchair nung arua takok marok agizük. Iba mapang ya ajak asoshi kanga dang temolung shirang, menungraba mapang ka liasü.
Conda stadium nung parnok sapur 20,000 jakdang tekümzüker rongnung Defender Neto aser winger Alan Ruschel nata iba sentong nung Jackson den külemi iba sempet agizük. Tasür kinungertemi parnok tenüng nung medal agizük.
Tekümzüker rongnung ano radio journalist Rafael Henzel mapai meyipa arua iba sentong nung tenzüktsü sangoktsüba nung shilem agi.
Iba asaya asoshi Chapeco yimti nung alirtem hopta junga yongya ata.
Mangyim tang tashi lir, aser club sapurtemi tang züngsem tasentem dak temolung malemer, saka yimti nung football tanaben asayaba anguba atema kanga pelar, ta taoba Chapecoense asayar Janca-i ashi.
Team tasen dak temolung melemi aliba Brazilian champions den draw asüba ajanga teimla ka agütsü, saka Brazil nung temaba team rongnung dena Copa Libertadores nung shilem agitettsü atema Santa Catarina state championship akoktsüla. Maneni tasür kibongtem atema fundraiser asütsü asoshi asaya tem asayatsü imlar, koba nung Barcelona den asaya ka dena lir.
Asaya tenzüker minute 71 buba nung sentepba aliba teloki tayimtsü nung asür par 71 nem akhüm tetushi aguja Portuguese oshi nung “Vamos, Vamos Chape” (Let’s go Chape) ta ayimten. Iba tayimtsü tsükokba nung parnok nisung 6 kümzük.