PM-i tanur 25 nem bravery awards agütsü

New Delhi, January 23 (Agencies): Hombarnü New Delhi nung Ato kilonser, Narendra Modi-i linük tesem balala nungi tanur 25 nem National Bravery Awards agütsüogo.
Iba sempet atema Indian Council for Child Welfare (ICCW)-i tanurtemji shima liasü.
Tangar dang nungi kanga alia tasütait mapa inyakba atema tanurtem nem tetushi sempet agütsütsü asoshi 1957 küm ICCW-i National Bravery Award Scheme ya tenzüka liasü.
Tanurtem nem awards agütsüba sentong nung jembidang Ato kilonser, Modi-i, “Parnok tasütait mapatemji ajanga item tanurtem temulungtetba aser tasütait tanela sayur,” ta ashi.
Award angurtem den jembidang Modi-i, “Iba award ajanga nü taküm nung nükjidong tembanger ta mebilemtsüla, saka iba ya tetenzüker ka dang lir ta bilemtsüla,” ta ayongzük.
Paisa, tasü aitbaji temulungtetba lir, temang anema aliba ajanga teyari angur, ajisüaka temulungtetbaji tulutiba lir, ta ashi.
Modi-isa, January 23, Netaji Subhas Chandra Bose asoba anogomung teratet metetdaktsüba den külemi tanurtem dang akokba tashi Netaji taküm otsü kaket azüngtsü ajungshi.
Iba sentong nung Women & Child Development Union Minister, Maneka Gandhi-a liasü.