Manipur nung Cong MLA 2 den Tatong Tir party nungi anener

Imphal, January 23 (Agencies): March ita Manipur nung assembly election agitsü lia Congress atema jenjang majungtsüsa tanü state unit Congress tatong Tir den MLA ana party züngsem nungi anenogo.
MLA ana- Nemcha Kipgen aser Vungzagin Valte nati party züngsem nungi anenba shidi party Tir, TN Haokip aser Speaker, Th Lokeshwor na nem agütsüogo, ta tenati metetdaktsü.
Tena anenba sülen menden 60 aliba assembly nung Congress MLA 45 dang kümogo.
Taoba assembly election nung Kipgen-i Kangpokpi constituency nungi takok angu aser Valte-i Thanlon assembly constituency nungi takok ngua liasü.
Ano Manipur Pradesh Congress Committee (MPCC) tatong Tir, S Achouba-a party züngsem nungi anenogo.
State sorkari district tasen tenet tentettsü lemtetba anema Manipur nung Naga nunger tongti tentet, United Naga Council (UNC)-i longkak aiter.
Yaküm Congress lenir tain asem- N Biren, Y Erabot aser Francis Ngajokpa nungera party nungi anener BJP nung dena liasü.
Manipur Assembly election shilem ana lemsar March 4 aser March 8 nü agitsü.
State nung BJP-i Chief Minister candidate tenüng mesangdongi tokteptsü.