ULB election ya ajungben mapa masü, timi agitsüla

Kohima, Jan. 23 (TYO) : Taruba ita February ka nü Municipal aser town council election agitsüba ya government-i ajungbena latetba mapa ka masü saka Supreme court nung 2013 küm nungi 2016 April tashi nung aiben angadanga arur ‘interim relief order’ agütsüba ajanga akatsüsa akümba maparen ka lir ta Joint Action Committee on Women Reservation (JACWR) teloki metetdaktsüogo.
Taoba küm aika Nagaland nung election magitsü atema obendangdak nungi kecha ken o agüja meliaka municipal aser town council election agitsüla ser nung magi aruogo aser Naga kin balala nungi tangang ali aser ki nung alimelen saruba onük anema nokdakba nungi tetsür nem 33% agütsüba onük tashi anema apusodagi, ibaji tetsürtem nem yimten tashi agütsüba anema nokdakba mapa ka asütsü ta parnokisa metetdaktsü.
Municipal aser town council agiba ajanga yimtaklirtem nem temzüng ozüngi temeten agüja alibatem dak mekongshir, kechiyong ibaibo town nung terenlok mapatem inyaktsü asoshi dang lir aser item terenlok mapatemji council nung züngsemtemi inyaktsü ta parnokisa metetdaktsü. Iba ama ULB tentetba nungji tetsür shilema talitsübasa ta parnokisa ashi.
Nagatsürtem election nung shilem agia toktepnüaka, tashiyim agi nokdangba ajanga tenüng magütsütet aser tenümg agüja alirtema meyipa agidaktsü. Ano tesem kar nungbo candidate-tem kiojen raksatsüba aser senso nungi jendokba mapatem Khristan-temi inyak memesük inyakogo, anungji state government-i item candidate-tem taküm aser rongsen kümzüktsüla aser election sentong ya timi agitettsüsa inyaktsüla ta JACWR telokisa metetdaktsüogo.