AKM lokti senden

Tan Changtongya nung Ao Kaketshir Mungdang (AKM) lokti senden amongba mapang pangzüng renemba rongnung ajak dang tongtibangtiba aser rongdak nüngdak ka reprangteta latetba pangzüngji ” AKM ketdangpurtem shimyim nung tsükong ajak longtepa inyaktsü aser iba shimyim mapaji lokti senden atongtsü ita ana jelia shimtsü,” ta latetbaji asütsü. AKM lenir asütsübaji khuret tulu aser yamaji maongkaa tulu, anungji aikati inyaktsü jangrar. Ibaji kanga junger. Ajisüaka, AKM ama lenitsü asoshi shimtsübaji mapa tasak kechiyong ibaji ‘students potitics’, anungji o aika jembitsüsa adoker aser mapanga agir. Aji oda, kodang menden ka raktepdir teshimtsü purtem asoshi khuret tulu akümer aser mungdang nung tongti o jembirtemi shisa tajung agütsüba angatsü melen ketdangpurtem shimtsüba mapa nungji dang mapang ajak endoktsüsa akümer. Iba jagi AKM lokti senden ali shia tongti o jembirtemi shisalemsatepba sentong nungbo AKM lenir aser taintemi anir kaketshirtem aika madener. AKM mungdang lipet liaka asenok dak temelenshi kangabo mereprangtetbaji, ashiko, mungdang nung asenoki shisalemsatepba sentong nung madenba ajanga asütsüa akok. Aor lokti senden ayongzüka akaba rongnung tongtibangtibaji Ao Kaketshir Mungdang (AKM) lokti senden aliba ya asütsü. Iba senden nung tanü kaketreju balala nung azünger aser züngtetter alir lanurtem yimtsüng aser town shia nungi arua adener. Aji oda, AKM lokti sendenji Aor lanur shisatokden tesem tongtibang ka akümer. Iba nungji kechi shisatsü molutetdir, iba jagi Ao kin dang masü saka Naga nunger anitsü aser yamaji ania aruogo. Iba tangatetba aser nükjidong nung AKM lokti senden ali shia omen tapet aser tajung shima tashitemetetertem nem jembidaktsür aser parnoki jembiba nung ajemdaker kaketshirtem rongnung shisalemsateper. Mungdang nung tagitsüji ibaji lir. Ajisüaka, tesasatsüka AKM lokti senden ali shia tesentepba aonung aser tanünep mongdang sentong lapokba sentong ana dak alaka kanga tongtibang sentongtem kong mungdang omen aser onük balala benoka shisalemsateper, item sentongtem nungbo kaketshirtem teimbaka arua madener. Ano tesasatsü tulutibaji shisalemsatepba sentong nung kar adenertem rongnunga kaketshir lenirtembo mangur, anungji talang nungi o jembir tajung jaoka yur parnoki jembibaji lenirtemibo mangashir. Ibaji kaketshir lenirtem asoshi takoksa tulu aser o jembirtem matsüngdanga taaktsüka lir. Aji oda, lenir taintemi anir kaketshirtem mungdangi arurtem teimbaka shisalemsatepdaki maruba atema tezüdanga bilemdang, kechiba parnok mungdangi aru (?) ta tasüngdangba arur. Atangji, lokti tentet tulu asünungji luden balala nung nüngdak ken o balala jembitsüsa adoktsü, ajisüaka itemji aonung sentep senshir mesüra anepbongi sentep sentong metenzükdang jembitsüla aser kechisüdir süaka taintemi anir mungdangi arur kaketshir ajak sentong ajak nung adentsüla.Shiba südir süang, AKM ama kati mungdang nung o jembitsü jaokba nisungji tashitemeteter aser pai mesüra laia nükenbelema onük renemer külen pei sen aser nübo tenla agüja arur kaketshirtem den jembir. Ibaji tenla tulu lir. Ibaji kaketshir lenirtemi züngshitsüla. Ano, tongtibang kaji item onük jembiba nungi tagitsü karbo agiteta mapa küma inyaktsü asoshi pangzüng küma renemtsü bilema angatsübaji kaketshir lenirtemi khuretsaa bilemtsüla. Aji oda, item ajakji temulung nung yur tang nungibo lemteta akaba amaji lokti senden atongtsü ita anabosa jelia lia AKM ketdangpurtem shimer mungdang tenzükra, kecha meinperong melii mungdang sentong ajak nung lanirtemi anir kaketshir ajak dena tajangzük angutsüsa amentsü imlar. Ano, kaketshirtem mungdang asünungji sobaliba tsütsüa kanga temulung agüja inyaktsü nüngdakba tesem ka reprangtetter. Aji oda, AKM lokti senden ya tanishirtem shimba mesüra kentenmenütepa pelatepa sentong ka dangbo masü saka tanü lima nung nüngdakba shisa tarok lemsatepdak aser sobaliba tajung angazükdak tesem ka küma amongtsü nüngdaker.