PM Modi-i UAE Crown Prince agizük

Mongulbarnü New Delhi nung Prime Minister, Narendra Modi-i Crown Prince of Abu Dhabi, Deputy Supreme Commander of U.A.E. Armed Forces, General Sheikh Mohammed Bin Zayed Al Nahyan pelaa agizükdang tangokba noksa angur. (New Delhi, January 24)

New Delhi, January 24 (Agencies) : Mongulbarnü Prime Minister Narendra Modi-i tayimtsü anendak Crown Prince of Abu Dhabi, Sheikh Mohamed bin Zayed Al Nahyan agizük.
Taküm Republic Day benjungmung nung Al Nahyan-i tongti tesemdanger ka ama shilem agitsü sentong lir.
Al Nahyan ya UAE armed forces nunga Deputy Supreme Commander lir aser pai India nung anogo asemnü amungtsü.
“India-i pelashishia agizüker. Na arubaji maongka ka lir aser Republic Day nung adentsü aruba asoshi kanga pelar” ta Modi-i tanü Twitter nung metetdaktsü.
“India aser UAE tsüngda tesentaktep takang lir aser amalitepa mapa inyaker. Iba tesentaktep tali akangshitsü imlar” ta paisa ashi.
Asüng India aser UAE tsüngda olemtep alidang energy, defence aser security onüktem benoka olemteptsü.
Yashi, Secretary Economic Relations Amar Sinha-i osangbener senden ka nung ashiba agi, linük ana tsüngda defence aser security nung telemtetba tajung kar agitsü aser iba asoshi linük anaprongi onük kar kasa tebilemba aliba lemsatepogo.
Taruba küm ana-asemka tsüngda UAE-i India nung USD 75 billion shi rizüngtsü asoshi telemtetba agitsü, ta Sinha-isa ashi.