South China Sea nung US kanga kümdangtsüla:China

Beijing, January 24 (Agencies) : China nem tagitsü aika ngutetba tzü tesem bendanga magidaktsütsü ta U.S-i ashiba sülen Mongulbarnü China-ia U.S dang South China Sea mangatettep ken o atema o mesüra mapa mashi jembia meinyaktsü shiogo.
“South China Sea mangatettep ken o nung U.S shilem agitsü mesüra tangutsü kecha mali,” ta China Foreign Ministry atema otongdar Hua Chunying-i osangbenertem dang ashi.
“U.S-i ochiba akhümtsübutsü onoki mepishir. Iba tesem nung yimjung aser tesünep meraksatsü mechi U.S-i O mesüra inyakyim balala nung kanga kümdangtsüla,” ta Hua-i ashi.
White House Press Secretary, Sean Spicer-i South China Sea kübok aliba international tzü China nem magidaktsütsü atema nokdangtsü ta ashiba sülen Hua-i item o ya jembia.
Osangkakettem nung ashiba agi, Spice-i ajak ajungtsü asoshi US-i bendanga agüja inyaktsü.
America Tir Donald Trump-i China iba tzü tesem nungi nokdangtsü metetdaktsüba sülen nungi alima nung rongsen lungtepba tzü tesem tulutiba nung China aser US na tsüngda tebilemtsü adokogo. Taoba mapang US Tir Barack Obama-ibo iba tsütsü kecha mashi.
US Secretary of State Rex Tillerson-i, South China Sea nung aliba asetkongtemi China meyoki nokdangtsü, ta ashiba ajanga China kanga jashir.
Küm shia South China Sea nung sen trillion dollar 5 alang shishilembateper.
South China Sea ya alima nung aliba tesemtem rongnung ajaki raktepnüba tesem ka kümogo. Iba tesem ya China den ano tzükümlen aliba linük pungu tashii rakteper.
Iba tzüpak nung pei aginüba asetkongtem nung terakteper linüktemi rara dang amashiba osettem amenoka lir.
Ajakji yutsür China-i iba tesem rangben parnok meyong ta ashir, ajisüaka yaküm international court-i ibaji aitsüogo.