Kohima nung R-Day atema traffic tetuyuba agütsür

Dimapur, January 24 (TYO) : January 26 nü Secretariat Plaza Kohima nung 68 buba Republic Day benjung amungtsü atema Kohima Police-i traffic tetuyuba kar agütsüogo.
Iba anogo nung Secretariat Plaza telungi ‘pass’ aliba garitem dang idaktsütsü aser Secretariat plaza tongti kishi anasa kimalen public parking lapoktsütsü, ta Sr. Superintendent of Police, Kohima-i sangdong ka nung metetdaktsü.
January 26 anepdang 6:00 nungi tsünglanglen agüja gari lenmangtem nung garitem manendaktsütsü.
(a) BSNL Telephone Exchange nungi Classic Island tashi.
(b) Raj Bhavan nungi M.S Classic Island tashi.
(c) Razhü Point adena Classic Island nungi Assembly Secretariat tashi.
Republic Day sentong agiba mapang Govt. departmental bus tem dak alaka gari tulutem Sanuoru subway adena High School junction nungi Assembly Secretariat tashi mesenzüdaktsütsü, ta sangdong nungsa metetdaktsüogo.
Maneni, sentong metembang tashi Kohima jila nung gari tulutem mesenzüdaktsütsü aser Kohima jila telongtet nung anepdang 6:00 ako matongdang ‘loading & unloading’ tembangtsüla aser gari tulutem “D” Block road nung manendaktsütsü, ta Kohima Police-isa ashi.
Iba tetuyuba sülen public-i tashi anga anidaktsü imlar aser aibelenertem indang gari police-i atsür aotsü aser iba taaji gari kiburtemi menoktsü, ta Sr. Superintendent of Police, Kohima-isa metetdaktsü.