AIFF-i tetsürtem football league tenzütsüogo

New Delhi January 24 (Agencies): All India Football Federation (AIFF)-i mezüngbuba tetsürtem football professional league Mongulbarnü tenzüktsüogo. Iba asayamung nung telok 6 shilem agitsü. Ambedkar Stadium New Delhi nung January 28 nungi asaya tenzüktsü.
Hopta ana tetsürtem football league ajanga India nung tetsürtem football nung jenjang tasen ka lapoktsü, ta AIFF President Praful Patel-i osangbenertem dang ashi.
Asayamung nung shilem agitsüpurtem yamai alitsü: — FC Alakhpura (Haryana), Jeppiaar Institute of Technology FC (Puducherry), Aizawl FC (Mizoram), FC Pune City (Maharashtra), Rising Student Club (Odisha) aser Eastern Sporting Union (Manipur). Parnok ajak telok ajak den melentepba asayatsü, aser temaba pezü nung atemertem semi-final asayatsü.
Qualifier asayaba nung state 9 nungi telok 20-i shilem agi, Iba nungi telok 9 IWL prelims asoshi shimtet koba 2016 October ita asaya liasü.
“Asenok tetsür team alima nung 54buba jenjang nung lir, koba teburtem (129) dang nungi temaba lir, anungji asenoki shitak anitetra taruba 2019 FIFA tetsürtem World Cup nung teburtem masayadang asayatsü asoshi shimtsü akok,” ta Patel-i ashi.
“Iba ya linuk nung tetsürtem football asoshi mezüngbuba jenjang lir. Tetenzükdang telok 6 agi tenzüker, saka sangküm tashi nungbo telok 16 tashi ajungkettsü imlar. Iba ajanga maneni tetsürtem asoshi football asayaba agi tebok mesüa alitsü asoshi lenmang lapoktsü. Ni team ajak dang junga asayatsü asoshi ajungshir,” ta pai shisem.
Dalima Chibber (FC Pune City), Oinam Bembem Devi (ESUFC), Sasmita Malik (Rising Student FC), Sanju Yadav (FC Alakhpura), Sumithra Kamaraj (Jeppiar Institute FC) aser K. Lalruaizeli (Aizawl FC) nungi par telok tenüng nung iba sentong nung arua aden. Parnok dak alaka Patel, Minister of State for Youth Affairs & Sports Vijay Goel, teloktem nungi ketdangsertem den 2016 Olympics melangtepba nung bronze medal angula, Sakshi Malik-a iba sentong nung aden.
Goel-i IWL tenzüktetba atema AIFF tenüng asang. “tanü lima nung tetsürtem tebur dang nungi temaba jenjangi tudar, aser nenok ajanga linük asoshi konang nüngsang bener arutsütsü imlar. Sorkar aser sports ministry-i nenok nüngdakba ajak nung yaritsü,” ta minister-i ashi.