Nagaland nung Naga nunger dang masü saka tsümartema kin kidong tapu balala nungi arua senso küma alir aika lir. Itemji Naga nunger den kasasa yimten nung shilem agitsüsa ‘voting right’ lir. Aji oda, municipal aser town council election nunga Naga nunger mesüra tsümar ta mali ajak kasasa shilem agitsü temeten lir. Ajisüaka, tang municipal aser town council election agitsüba dak sendakba maparen nung mangatettep ken o adoka aliba yabo tsümartemji maden asenok Naga nungertem rongnung mangatettep adoka rarabangsen adokba angur. Jungjunga bilemdangra, ibaji tesüngmangtsüka lir. Iba ama Naga nungertem rongnung mangatettep adokba ya asenoki mangatettepi linüba agi masü saka alemli tejen putu mapang nung ama, asenok o asenok na mangatetteptsüsa oshi balala kümdaktsüba mesüka lir. Nagaland nung Municipal aser Town Council election agitsüba onük nung state government o Naga kin balala nungi lenirtem na tsüngda ajurutepa shisalemsatepba mapanga liogo. Iba sülen government-i election agitsüba osang sangdongogo. Ajisüaka, tangatettep kati marutetter. Government-i ashir, nübortemi Municipal Act nung melenshidaktsünüba ajak melenshiogo saka nübortemi iba o ji magizüker aser government-i nübortem akoksatsüsa inyaker ta aitsür. Iba amaji government o nübortem na tsüngda oshi mangatetteper. Aji oda, nübortemi election magidaktsüner saka kasa Naga nübortemi shimba Naga government-i agitsübasa ta nokdaker. Ano, külen nübortemi election agitsüba mapa anema nokdaksümonga, ngasangatemer amato Naga nungertemi election nung tokteptsü asoshi nomination file asür. Ibayongji, tang Urban Local Bodies (ULB) election agitsüba nung mangatettep adokba ya Naga nunger government o Naga nübortem na aser Naga nunger candidate-tem tsüngda rara ka kümogo. Joko, tesem kar nungbo ULB election maparen nung Naga nungertem rongnung mangatettep adoka pei nübortemi kiojen rakasaja meindokba aser pei kini senso nungi jendokba tashi atalokdagi. Aji oda, pei nübortemi ashi manga election nung tokteptsü asoshi nomination agütsürtem karbo joko pei lima nungi meindoker talidak maka timtema senzüdagi. Item ajakji asenoki inyaknüba agi inyaker masü saka asenoki mekoktettsüsa tashih ka agi asenok süshir, iba jagi asenok o asenok na tsüngda oshi balala kümadoker mangatettep adoker.Iba ama kasa nübortem rongnung oshi balala jembia mangtettep adokba tialong nung asenok tanü Indian Republic Day amonger. Republic day amongba tamaitsü ya shinga küboka masü saka linük temzüng ozüng ka kübok nübortem ajak liromdema aotsü apusoba anogo bilemteta amongba anogo lir. Iba ama anogo mong amongdang, talisa Nagaland state ama ka, yimten nüchiso melena agütsüba state ka ama züngshia India temzüng nung Nagaland atema kechi shia lir, itemji reprangdanga shisalemsateptsüla. Nagaland state akümba yabo India nung tanga state akümba yimya nung masü saka tezüluba nung tangatetep onük tertrok nung ajemdaker küma lir. Atangji, khen khen asenoki ibaji aija jembir saka ano tanü amaibo asenoki ibaji tushia jembir. Ibaji nisunger yimya aser yimten nung alirtem yimsü. Iba amaji, yimten teloktemia election aru shia oshi balala jembir. Tanü yamai Naga nunger rongnung mangatettep adokba ya, ken bilemtsübo, ajak ajasaa orr tasen tajung ka yanglutsü Tsüngremer sentong nung ali südi taka bilemer. Iba amai kasa nübortem rongnung mangatettep adoka tebilemtsü ajurudang dang lenir shitakba asü tailar metetter. Iba ama mapang nung shibai pei nübortem ashi manga tekong merangdir, pa mesüra lajibo nübortem tenzüktsü asoshi masü saka pei yangku asüngtsü bilema nübortem tenzükba mapa nung shilem aginer asütsü. Aji oda, lokti tenzükertem rongnunga shibai lokti tebilemtsü ajurua akoktsü melen tapu tapu kuli agütsür tebilemtsü anasai marur, pa mesüra laji lokti masü pei ajung apia tenüngsang aginüba agi tenzüker asüsü. Itemji nübortemi angatettsüla aser ajioktsüla aser tansütsü lesson kar sayutsüla.
Share on Facebook
Follow on Facebook
Add to Google+
Connect on Linked in
Subscribe by Email
Print This Post
You must be logged in to post a comment Login