J&K nung rürjep agi nisung 5 anenset

Srinagar, January 25 (Agencies): Bodhbarnü Jammu & Kashmir, Ganderbal district nung rürjep anenzüka aluba tatalokba lendong ana nung sepai ka den nisung pongu süogo.
Police ketdangser kati ashiba agi, tanü nikongdang rürjep jagi Sonamarg nung aliba army camp anenbanga High Altitude Warfare School (HAWS) nung Army officer, Major Amit asü.
Ano tanga tatalokba ka nung, Kashmir nung Line of Control (LoC) anasa Gerez sector nung rürjep agi ki ka anenbangba tatalokba nung kibong ka nungi züngsem pezü asü, ta police ketdangser kati ashi.
Rürjep anenzüka alua Habibullah Lone’er ki anenbangba lendong nung pa den pa kinüngtsü, jala ka aser jabaso ka asü, ta parnokisa ashi.
Ketdangsertemi item tesemtem nung rürjep anenzüka alutsü, anungji nüburtemi pei ki nungi ayazüka malutsü tekümdangtsü metetdakja liasü.
J&K tenemlen aliba tesemtem nung rür alaba sülen rürjep anenzüka aluba lendong kanga bulua ataloker.
Police aser kümzükba maparen inyakertemi arishi küm 18 tebur ka rürjep agi anenbanga aliba nungi kümzükogo.
“Tanep yimtak 4:00 ako meta rürjep anenzüka aluba lendong nung kibong ka nungi züngsem pezü asü. Nisung kabo kümzükogo,” ta IGP, Javid Gillani-i ashi.
Kashmir nung tesüiba küm ishika tsüngda taküm temekongba lir aser tesem nung rür kanga alaba ajanga temperature minus seven degrees Celsius (19 degrees Fahrenheit) tashi ajema aluogo.
Meteorologist temi ano maneni taruba anogo asem rürjep kanga alatsü ta takzütetogo.