Kim Jong-Un’er sorkar techireper: Thae Yong-Ho

Seoul, January 25 (Agencies) : North Korea nung sorkar chireptsü mapang ana nung lir kechiyong nübortemi parnok dak temulung malemer, ajisüaka sorkari nuclear alizüngtem atongtsü atema inyaker, ta Bodbarnü North Korea toktsür jena aoer kati ashi.
“Kim Jong-Un indang anogotem süitemdar” ta yaküm August ita North Korea deputy ambassador to Britain teinyakdak nung linük toktsür jena aosang Thae Yong-Ho-i ashi.
Thae Yong-Ho-i tang mezüngbuba atema foreign correspondents den ajurutepa sensaksemdang, pai linük toktsüba ama külem linük sensotemi linük toktsütsü kechiyong North Korea chirepa taoer, ta ashi.
Tashi temetetertem aser takartem teloki Kim Jong-Un sülen manidaker aser North Korea nung akhidang nungi benshia aruba inyakyimtem loksa aoer, ta paisa metetdaktsü.
1948 küm North Korea tentetba sülen Kim’er kibongi sorkar yimsü süa arur. North Korea nung meimchir temeten anema mapa kanga inyaker aser ozüngi memelaba nuclear & missile programmes inyaker ta tai tonglokja United Nations Security Council-i par linük nung tenokdangba agüja lir.
Küm ishika tsüngda North Korea linük toktsüba ketdangsertem rongnung Thae ya jenjang tuluba lir.
Küm pungu tejaklen Kim-i tebu asür Kim Jong-Il ket nungi tashi anguba sülen ketdangsertem taochi makai reshikangshiba anema Thae-i linük toktsütsü mulungtet, ta ashi.
2013 küm tatemlen Kim-i pa tebu tanubo aser pa asoshi yimtenren tesayur Jang Song-Thaek aija tepset.
North Korea ketdangsertem bendangleni aodang parnok chirnur rongnung nisung kabo linük nung yutsür aotsü tetuyuba lir. Ajisüaka, Thae-i par jabaso anaprong London-i anir otet.
“Kim Jong-Un’er sorkari North Korea ketdangsertem azüoktsü atema tsürabur aser tanurtem tsüngda temeim sensamasatsür” ta Thae-isa shisem.
Thae-i linük toktsür jena aoba sülen North Korea indang media-i pa dang ‘meimchir tamajung’ ta aja aser pai senotsü tim mesüi amshiba, tanur ka tashiyim agi raksatsüba aser sen yong South Korea atema itdangiter ka ama inyak ta tai tonglokja liasü.
“North Korea indang nuclear maparen anendaktsütsübaji Kim Jong-Un’er sorkar samatsüba ajanga dang angutsü” ta Thae-isa osangbenertem dang ashi.